Astana mektepteri 5 kúndik oqý júıesine tolyq kóshken joq
ASTANA. QazAqparat - Astana qalasy bilim basqarmasy qala mektepteriniń 5 kúndik sabaq kestesine ne úshin birdeı kóshpeý jaǵdaıyn túsindirdi, dep habarlaıdy QazAqparat tilshisi.
«5 kúndik oqý aptasyna kóshý boıynsha tapsyrma keldi. Biz óz tarapymyzdan barlyq mektepterdi osy rejımge múmkindiginshe aýyrtpalyqsyz aýdarýǵa tyrystyq. Biraq búgingi tańda áli de kemshilikter bar ekeni ras», - dep jazady Astana qalasy bilim basqarmasynyń baspasóz hatshysy Jazıra Asanova Feısbýktegi paraqshasynda.
Baspasóz qyzmeti taratqan málimetterge qaraǵanda, qazirgi tańda 84 mektepten 71 mektep 5 kúndik oqytýǵa aýysty. Munda keıbir jaıttar bar - eger mektep jalpy bilim berý mektebi bolsa, onda ol 1-den 11-shi synypqa deıin 5 kúndik merzimge kóshti. Eger mektep ınnovatsııalyq bolsa, onda tek 1-4 synyptar tolyq 5 kúndik kezeńge aýystyrylady, al basqa synyptar 5 kún sabaq ótip, senbide olarda varıatıvti, ıaǵnı tańdaý boıynsha pánder men qosymsha sabaqtar júrgiziledi. 10 mektepte (5,13,14,24,27,31,40,74,75,57) úsh aýysymdyq rejım oryn alǵandyqtan, 5 kúndik rejımge ótý ázirshe múmkin emes. Sondaı-aq, Zerde mektebi men eki BIL 5 kúndik mektepke aýystyrylmaıdy. Sebebi olarda 1-4 synyptar joq. 40 mınýttan ótetin 7-8 sabaq byltyrǵy 45 mınýttan ótetin 5-6 sabaqpen ýaqyttary sáıkes.
