Astana mektebinde mehanık matematıkadan sabaq berip kelgen

ASTANA. QazAqparat – QR Oqý-aǵartý mınıstrliginiń apparat jınalysynda Bilim salasynda sapany qamtamasyz etý komıtetiniń tóraǵasy Ernur Daýrenov dıplomy mamandyǵyna sáıkes kelmeıtin muǵalimder týraly aqparat berdi, dep habarlaıdy QazAqparat tilshisi.

«Sapany qamtamasyz etý komıteti men departamentteri aýdandyq jáne qalalyq bilim berý bólimderiniń jumysyna erekshe nazar aýdarady. Pedagogterdi jumysqa qabyldaý boıynsha eń kóp zańsyzdyqtarǵa jol bergen bilim berý bólimderin atap ketýdi jón kórip otyrmyz. Olar: Almaty oblysynyń Qarasaı aýdany, Túrkistan oblysynyń Túrkistan qalasy men Tóle bı aýdany, Qaraǵandy oblysynyń Qaraǵandy qalasy men Buqar jyraý aýdany, Batys Qazaqstan oblysynyń Oral qalasy men Terekti aýdany, Jetisý oblysynyń Taldyqorǵan qalasy men Alakól aýdany, Qyzylorda oblysynyń Shıeli aýdany. Atalǵan aýdandyq, qalalyq bilim berý bólimderine aldaǵy ýaqytta oblystyq bilim basqarmalarynyń pedagogterdi qabyldaý erejelerine baılanysty semınarlar ótýi qajet dep esepteımiz», - dedi komıtet basshysy.

Sondaı-aq, ol biliktilik talaptaryna sáıkes kelmeıtin tulǵalardy mektepke jumysqa alý faktileri kóp ekenin atap ótti.

«Bul jaǵdaılar kóbinese Almaty, Jetisý, Túrkistan, Jambyl oblystarynda jáne Astana qalasynda kezdesedi. Mysaly, Astana qalasynyń mektepterinde pedagog retinde dıplomdary biliktilik talaptaryna sáıkes kelmeıtin tulǵalar jumys istegen. Mehnık mamandyǵy bar adam matematıkadan sabaq bergen, dızaıner mamandyǵy bar maman kórkem óner páninen sabaq bergen. Al matematıka páninen jumys izdeýshiler ol kezde bolǵan. Atalǵan mektep basshylaryna tártiptik jaza qabyldandy», - dedi Ernur Daýrenov.