«Astana-Mekke» beıbitshilik marafony (FOTO)
ASTANA. QazAqparat - Bizge málim, tarıhymyzda qasıetti Mekke shaharyna jaıaý qajylyq saparyna shyqqan babalarymyz bolǵan. Tekti atanyń urpaǵy búgingi jahandaný zamanynda, ǵylym men tehnıkanyń qaryshtap damyǵan dáýirinde de baba izinen jańylmapty. Elorda turǵyny Dýlat Imanqajy baba dástúrin jańǵyrtyp, búgin «Nur Astana» ortalyq meshiti alańynan jeti myń shaqyrym qashyqtyqtaǵy qasıetti Mekkege attandy, dep habarlady muslim.kz saıty.
Erdiń jasy elýge taıaǵan Dýlat mamandyǵy qarjyger bolǵanymen sport salasynan da qara jaıaý emes. Sońǵy tórt jyldan beri elordamyzdyń №56 mektep-lıtseıinde shańǵy úıirmesiniń bapkeri ári №10 qalalyq emhananyń qyzmetkeri. Jaıaýlatyp talaı asýdan asatyn Dýlat buǵan deıin Almaty qalasynan Baqanasqa deıin marafon jasaǵan. Bul jeńisin kórnekti qoǵam qaıratkeri, memleket jáne qoǵam qaıratkeri Dinmuhamet Qonaevtyń toqsan bes jyldyǵyna arnapty.
Búgingi bel baılap otyrǵan alys saparǵa shyǵýyna túrtki bolǵan jaıdy Dýlat Imanqajy bylaı túsindirdi. «Týǵan jerim Semeı óńirinde bolǵan bir basqosýda Din isteri agenttiginiń tóraǵasy Marat Ázilhanovpen kezdesip, ekeýara áńgimemiz jarasyp, men ol kisige elimizdegi marafondy ilgeriletý tóńiregindegi oıymdy jetkizdim. Óıtkeni, salaýatty ómir saltyn qalyptastyrýdy din de qoldaıdy ǵoı. Osylaısha Astanadan Mekkege deıin júgirip baryp-kelýge táýekel ete alatynymdy aıttym. Ol qyzyǵýshylyq tanytyp, quzyrly oryndar tarapynan qoldaý kórsetýge ýáde etti. Sonymen qatar, Astana meshitteriniń ımamdary qajylyq mindetimdi de atqara kelýimdi usyndy. Bul men úshin úlken demeý, úlken qýanysh boldy» deıdi marafonshy.
Dýlattyń izgi saparyna qoldaý kórsetip jatqan el azamattary da jeterlik. «Nur Otan» partııasy, Syrtqy ister mınıstrligi, «Nur Astana» ortalyq meshiti, «Megasport» sporttyq brendter dúkeni basshylyǵy, Parlament Májilisiniń depýtattary, Aýǵanstan soǵysynyń ardageri Baqytbek Smaǵul, Talǵat Erǵalıev jáne ózi ýaqytsha jumys istep júrgen №10 qalalyq emhananyń ujymy demeýshilik tanytyp, qoldaý kórsetýde.
Búgingi marafonshyny saltanatty túrde shyǵaryp salý rásimine «Nur Astana» meshitine memleket jáne qoǵam qaıratkerleri, meshit ımamdary men qala turǵyndary jıylyp, onda Qazaqstan Respýblıkasy Parlamenti Májilisiniń depýtaty, Aýǵanstan soǵynysynyń ardageri Baqytbek Smaǵul sóz sóılep, Dýlat Imanqajyǵa sát sapar tiledi. «Baıyrǵy baba dástúrin qaıta jalǵap, tektiliktiń belgisin kórsetip otyrǵan Dýlatqa Alla jar bolsyn, saparyn oń qylsyn dep tileımiz. Búginde tehnıkanyń san myń túri damyǵan zamanda, jaıaý júgirip Mekke shaharyna qajylyq etý erdiń isi. El eriniń esendigin tileıdi. Saparyń oń bolsyn» dedi halyq qalaýy júrekjardy tileginde.
Dýlat Imanqajy búgingi Elorda toıynda bastalǵan úsh aıǵaǵa sozylatyn saparynda Mekkege deıin jeti myń shaqyrymdy basyp ótse, keri qaıtarda da osynsha qashyqtyqty baǵyndyrady eken.
«Alda Ázerbaıjan, Iran, Kýveıt, Saýd Arabııasy elderiniń topyraqtaryn basyp ótedi ekenmin. Saparymnyń basym bóligi ystyq klımatty elderge túsip otyrǵany ońaı bolmasy anyq. Alaıda, táýekel, Alla qýat bersin!» deıdi D.Imanqajy. Marafon sportynyń tarıhyna úńilsek, álemniń eń myqty júgirýshilerdiń ózi on kúnnen artyq jolda bolmapty. Al, bolashaq qajymyzdyń marafony úsh aıǵa sozylmaq.
Marafonshynyń bul saparynda qajylyǵyn atqara kelýin usynǵan meshit ımamdary da Jaratqannan duǵa etip, sáttilik tiledi. «Alla taǵala myna qasıetti Ramazan aıynda barsha izgi amaldarymyzdy, sonyń ishinde Dýlat baýyrymyzdyń nıeti men saparyn qabyl etsin. Rabbymyz elimizge tynyshtyq, jerimizge bereke berip, barsha qajylardyń saparlary ońdy bolýyn násip etsin» dep bata berdi «Nur Astana» meshitiniń naıb ımamy Abdýsamad Mahat.
Al, marafonshymyzdyń esimi jurtshylyqqa 2010 jylǵy Aq Azııada oıyndarynan tanys. Halyqaralyq dodanyń qurmetine ol Almaty men Astananyń arasyn bir aptada júgirip ótken. Sol kezdegi sapar biraz qıynshylyqqa túskenimen, namysty qoldan bermeýge bel baılaǵan Dýlat Imanqajy máreni laıyqty kesip ótken.
