Astana medýnıversıtetiniń stýdentterine jemqorlyq máseleleri túsindirildi

Kezdesý QR Memlekettik qyzmet isteri jáne sybaılas jemqorlyqqa qarsy is-qımyl agentiginiń «Astana - adaldyq alańy» jobasy aıasynda uıymdastyryldy.
Shara aldynda atalmysh joba jetekshisi, QR Memlekettik qyzmet isteri agentiginiń Astana qalasy boıynsha departamenti basshysynyń orynbasary Jazıra Jylqyshıeva tilshilerdiń suraǵyna jaýap berdi. Onyń aıtýynsha, joǵary bilim júıesinde sybaılas jemqorlyq táýekelderin joıýǵa yqpal etetin - aldyn alý sharalaryn júrgizý qajet.
«Bizdiń maqsatymyz - sybaılas jemqorlyqqa qarsy mádenıetti qalyptastyrý. Keleside osyndaı jaǵdaıdy boldyrmas úshin (IELTS sertıfıkatyna qatysty daý-damaı - avt.) báriniń aldyn alýymyz qajet. Búgin L.Gýmılev atyndaǵy EUÝ-da jáne taǵy bir-eki JOO-da bolyp qaıttyq. Bul jerde ózderińiz biletindeı, BAQ-ta biraz keleńsiz jaǵdaılar jóninde aıtylyp ketti. Sondyqtan, osy ýnıversıtette birinshi ótkizýdi jón kórdik. Ýnıversıtet basshylyǵy jaǵdaı jasap, 370-ke jýyq stýdentpen jáne oqytýshylarmen kezdestirip otyr. Nátıje bolady. Óıtkeni, eger stýdentter buǵan deıin qandaı organdar baryn bilgende, múmkin habarlar ma edi?... Bular bilmegendikten keıin osyǵan baryp otyrǵan sekildi. Sondyqtan, qazir stýdentterge barlyq baılanys nómirlerimizdi qaldyryp, aldaǵy ýaqytta qaıda habarlasýǵa bolatynyn túsindiremiz», - dedi Jazıra Jylqyshıeva.
Sonymen birge, Jazıra Jylqyshıevaǵa tilshiler Astana medıtsına ýnıversıtetinen 117 stýdenttiń shyǵarylýyna qatysty tolyǵyraq jaýap berýin surady.
«Árbir quqyqqorǵaý organynyń ýákilettiligi men mindeti bar. Meniń aıtarym - sottyń sheshimi shyǵyp, ol kúshine enbeıinshe, biz qandaı da bir pikir bildire almaımyz. Tipti, osy isti tergep jatqan organdar da pikir bildirmeıdi», - dedi Jazıra Jylqyshıeva.
Eske sala ketsek, búgin keńes ótip jatqan «Astana medıtsına ýnıversıteti» AQ-dan IELTS sertıfıkatyn satyp alǵan 100-den astam bilim alýshy oqýdan shyǵarylǵan bolatyn.