Astana medýnıversıtetinen shyǵarylǵan stýdentter qansha qarjy qaıtarýy tıis
ASTANA. QazAqparat - Astana medıtsına ýnıversıtetiniń jalǵan IELTS sertıfıkatymen túskeni úshin oqýdan shyǵarylǵan bilim alýshylarǵa jumsalǵan qarajat kólemi belgili boldy. Mundaı derekpen búgin atalǵan bilim ordasynyń Joǵary oqý ornynan keıingi bilim fakýltetiniń dekany Ernar Tursynbet bólisti, dep habarlaıdy QazAqparat tilshisi.
«Magıstratýra men rezıdentýra boıynsha aı saıyn 61 561 teńge shákirtaqy tólenedi. Doktorantýrada oqıtyn bilim alýshylar 81 998 teńge shákirtaqy alady. Munan bólek, aı saıyn oqýǵa magıstratýrada 61 myń teńge, rezıdentýrada 67 myń teńge jáne doktorantýrada 120 myń teńge jumsalady», - dedi ol daýly máselege oraı uıymdastyrylǵan baspasóz máslıhatynda.
Onyń aıtýynsha, oqýdan shyǵarylǵan 117 adamnyń 82-si rezıdentýrada, 24-i magıstratýrada jáne 11-i doktorantýrada bilim alǵan. 66 adam 1-shi kýrstan, 51 adam 2-shi kýrstan oqýdan shyǵarylyp otyr.
Sonymen qatar Ernar Tursynbet bilim alýshylardyń jalǵan sertıfıkattaryn oqýǵa túsý kezinde qabyldap alǵan komıssııa múshelerine shara qoldanylǵanyn aıtty.
«Qabyldaý komıssııasynyń quqyqtary men mindetteriniń barlyǵy oqýǵa qabyldaý týraly úlgilik qaǵıdalarda jazylǵan. Olarǵa qatysty sharalardyń barlyǵy bizdiń tarapymyzdan oryndaldy. Sondyqtan da bul rette ýnıversıtetti kináli dep sanaý artyqtaý bolady. Sertıfıkattardy qabyldaý komıssııasy kóshirmesin túpnusqamen salystyryp qana tekseredi. Odan ary tekserýge ýnıversıtettiń quqyǵy joq», - dedi fakýltet dekany.
Aıta keteıik, baspasóz máslıhaty barysynda Astana medıtsına ýnıversıtetiniń rektory Májıt Shaıdarov jalǵan sertıfıkatpen magıstratýra, rezıdentýra jáne doktorantýraǵa túskenderdiń tizimin jarııalanatyndyǵyn aıtqan edi.
Budan buryn habarlanǵandaı, «Astana medıtsına ýnıversıteti» AQ-ǵa túsý úshin IELTS sertıfıkatyn satyp alǵan 100-den astam stýdent oqýdan shyǵaryldy.
2017 jyldyń kúzinde emtıhandy óz kúshimen tapsyrǵandar jalǵan sertıfıkat usynǵandardyń baryna shaǵymdanyp, aryz túsirgen bolatyn. Oǵan sáıkes tekseris júrgizilip, nátıjesinde aǵylshyn tilin bilý deńgeıi boıynsha tirkelmegen 117 sertıfıkat anyqtaldy.
Keıin QR Bilim jáne ǵylym mınıstri Erlan Saǵadıev bul máselege qatysty pikir bildirip, tıisti komıssııa qurylatyndyǵyn málim etti.
Sonymen qatar, mınıstr atalǵan oqıǵadan keıin ózge de oqý oryndary tekseriletinin atap ótti.
Stýdentterdiń jalǵan IELTS sertıfıkatymen oqýǵa túsý faktisi boıynsha quqyq qorǵaý organdary aınalasyp jatyr.
