Astana medresesinde ustazdar eksperımenttik oqý jumys josparyndaǵy pánderdi talqylaıdy
ASTANA. 23 qańtar. QazAqparat - 24-28 qańtar kúnderi Qazaqstan musylmandary dinı basqarmasy dinı oqý-aǵartý bóliminiń uıymdastyrýymen elordadaǵy Astana medresesinde bes kúndik semınar ótkizý josparlanyp otyr.
Qazaqstan musylmandary dinı basqarmasy baspasóz qyzmetiniń málimetinshe, atalǵan sharaǵa Dinı basqarmanyń bólim meńgerýshileri men Táýelsizdigimizden keıin elimizdiń túrli aımaqtarda ashylǵan toǵyz medreseniń basshylary, ádiskerleri men ustazdary qatysady dep kútilýde. Atap aıtsaq olar - Astana, Ábý Hanıfa, Shamalǵan, Shymkent, Saryaǵash, Aqtóbe, Ábý Bákir Syddyq jáne Oral medreselerimen qosa Qaýamıddın ál-Itqanı ál-Farabı ál-Túrkistanı atyndaǵy qarılar ortalyǵy.
Semınardyń negizgi maqsaty - medrselerge arnalǵan úsh jyldyq eksperımenttik oqý jumys josparyndaǵy pánder men olarǵa bólingen saǵat sandaryn talqylap, Bilim jáne ǵylym mınıstriligine usyný. Osymen qatar semınarda - arab tiliniń sıntaksısi men morfologııasy, aqıda, fıqh pánderiniń ustazdary osy salalar boıynsha biliktilikterin jetildiredi. «Buǵan dáris oqý úshin, elimizdegi ózderin ábden shyńdaǵan, bilimdi mamandar tartylǵan. Buryn tájirıbe almasý maqsatynda semınarlar ótkizilip kelse de, bıyl medrese ustazdarynyń biliktilikterin jetildirý máselesi alǵashqy ret qolǵa alynyp otyrǵandyǵyn eske sala keteıik»,-delingen atalǵan málimetterde.
