Astana medıtsınalyq týrızm ortalyǵyna aınala ala ma
ASTANA.KAZINFORM – Astanada halyqaralyq JCI akkredıtatsııasynan ótken toǵyz klınıka bar. Qazir medıtsınalyq týrızm elordadaǵy týrızm salasyn damytýdyń perspektıvaly baǵyttarynyń birine aınalyp keledi. Bul týraly Astana Tourism týrızmdi damytý ortalyǵynyń týrıstik baǵyttar men qyzmetterdi damytý departamentiniń dırektory Olga Abeldınova AIMAQ podkastynda aıtty.
Onyń aıtýynsha, Astanada halyqaralyq JCI akkredıtatsııasy bar toǵyz klınıkalardyń qatarynda memlekettik te, jekemenshik te medıtsınalyq uıymdar bar.
Qazir qala ákimdigi medıtsınalyq uıymdarmen jáne týrıstik qaýymdastyq ókilderimen birlesip, sheteldik patsıentterge kórsetiletin qyzmet sapasyn arttyrý jáne olar úshin arnaıy usynystar ázirleý baǵytynda jumys istep jatyr.
– Bizdiń mindetimiz medıtsınalyq týrpaketter men keshendi medıtsınalyq tekserýden ótý qyzmetterin bir júıege keltirip, olardy sheteldik naryqqa usyný. Osylaısha medıtsınalyq týrızm baǵyty boıynsha tanymal bolǵan basqa eldermen básekelese alamyz, – dedi Olga Abeldınova.
Sonymen qatar Skyway týroperatorynyń jetekshisi Ásem Qozbaǵarovanyń aıtýynsha, mundaı usynystar qazirdiń ózinde bar. Keıbir klınıkalar medıtsınalyq qyzmetterdi qamtıtyn arnaıy paketterdi ózderi ázirleıdi. Sonymen qatar bul baǵytqa týrıstik kompanııalardyń da qyzyǵýshylyǵy artyp keledi.
– Kóptegen klınıkalar mundaı qyzmetterdi usynyp júr. Astanaǵa Eýropa, Amerıka jáne Azııa elderin qosa alǵanda, álemniń ártúrli bóliginen sheteldik týrıster keledi. Bastapqyda bul baǵytqa kúmánmen qaraǵan edim. Alaıda sońǵy bir jylda oǵan degen qyzyǵýshylyǵymyz arta tústi. Bizdiń kompanııada da osy baǵytpen aınalysatyn bólim ashyldy. Árıne, eń aldymen Astanaǵa basymdyq berip otyrmyz, – dedi Ásem Qozbaǵarova.
Onyń aıtýynsha, sheteldik patsıentter medıtsınalyq qyzmetti birneshe faktorǵa súıene otyryp tańdaıdy. Biri medıtsınalyq kómektiń sapasy men qyzmet kórsetý deńgeıine mán berse, endi biri em-dom men tekserýdiń qunyna qaraıdy. Sondaı-aq keıbir patsıentter naqty bir dárigerge qaralý úshin arnaıy keledi.
Sarapshy elordanyń taǵy bir artyqshylyǵy retinde zamanaýı dıagnostıkalyq jabdyqtar men medıtsınalyq tekserýlerdiń qoljetimdi baǵasyn atady.
– Bizde dıagnostıkalyq jabdyqtarmen qamtamasyz etý deńgeıi joǵary. Sonymen qatar medıtsınalyq tekserýlerdiń quny basqa eldermen salystyrǵanda áldeqaıda tómen. Menińshe, bul – Astanany medıtsınalyq týrızm ortalyǵy retinde tanytýǵa jaqsy negiz. Sapa men qoljetimdi baǵanyń úılesýi bizdiń basty artyqshylyǵymyz. Osy baǵytty tereńirek zertteı bastaǵanda, elimizde zamanaýı ári sapaly jabdyqtar bar ekenin, al medıtsınalyq qyzmetterdiń baǵasy qoljetimdi ekenin baıqadym. Qazir bul baǵyt ishki týrızmde de suranysqa ıe bolyp keledi, – dep atap ótti sarapshy.
Ásem Qozbaǵarova Qazaqstan sheteldik medıtsınalyq ortalyqtarmen básekelese alatyn baǵyttardyń qatarynda stomatologııa, neırohırýrgııa jáne kardıohırýrgııany atady.
Sarapshynyń pikirinshe, medıtsınalyq qyzmetterdiń sapasy men baǵasynan bólek, sheteldik patsıentterdi qyzmet kórsetý deńgeıi de qyzyqtyra alady. Ásirese patsıenttermen durys ári tıimdi qarym-qatynas jasaı alatyn bilikti mamandardyń bolýy mańyzdy.
Aıta keteıik, medıtsınalyq týrızmniń biryńǵaı marketpleısi engiziletinin jazǵanbyz.
