Astana medıtsınalyq týrızm habyna aınalyp keledi
ASTANA. KAZINFORM — Astana qalasynda medıtsınalyq týrızmdi damytý aıasynda sheteldik dárigerler men medıtsınalyq agentterge arnalǵan aqparattyq týr ótip jatyr. Іs-shara elorda ákimdigi men «Astana Tourism» týrızmdi damytý ortalyǵy bastamasymen uıymdastyrylyp otyr. Bul týraly Astana qalasynyń ákimdigi málim etti.
— Halyqaralyq delegatsııa quramynda Reseı, Qyrǵyzstan, Tájikstan jáne Ázerbaıjan elderinen kelgen dárigerler, sala sarapshylary jáne medıtsınalyq ınflıýenserler bar. Olar qalanyń medıtsınalyq týrızm múmkindikterimen tanysyp, Astananyń áleýetin sheteldik patsıentterdi emdeýdiń perspektıvalyq baǵyty retinde baǵalaıdy. Baǵdarlama aıasynda qonaqtar elordanyń 11 jetekshi medıtsınalyq mekemelerine, onyń ishinde Joint Commission International (JCI) halyqaralyq standarty boıynsha akkredıtatsııaǵa ıe ortalyqtarǵa barý josparlanǵan, — delingen habarlamada.
Sondaı-aq, medıtsınalyq uıymdardyń ókilderimen kezdesýler barysynda yntymaqtastyq sharttary men patsıentterdi Qazaqstanǵa emdelýge jiberý múmkindikteri talqylanady. Aqparattyq týrdyń negizgi baǵyttarynyń biri — tikeleı seriktestik baılanystar ornatý. Kezdesýlerdiń qorytyndysy boıynsha qazaqstandyq klınıkalar men sheteldik áriptester arasynda kelisimderge qol qoıý josparlanyp otyr, bul sheteldik patsıentterdi Astanaǵa jiberý boıynsha júıeli jumys qurýǵa múmkindik beredi.
— Astanada medıtsınalyq týrızmge degen qyzyǵýshylyq artyp keledi. Sala derekterine sáıkes, 2024 jyly Astanaǵa 4,5 myń medıtsınalyq týrıst kelgen, bul 2023 jylǵy kórsetkishten eki ese kóp. Al 2025 jyly sheteldik patsıentterdiń sany 6112 adamǵa jetti, — dep habarlady ákimdikten.
Elordadaǵy medıtsınalyq týrısterdi qyzyqtyratyn baǵyttar qataryna kardıohırýrgııa, neırohırýrgııa, stomatologııa, ortopedııa, reprodýktıvti medıtsına jáne keshendi check-up baǵdarlamalary jatady. Aqparattyq týrdy ótkizý halyqaralyq yntymaqtastyqty damytýdaǵy mańyzdy qadam bolyp tabylady jáne Qazaqstannyń Ortalyq Azııadaǵy joǵary tehnologııalyq medıtsınanyń zamanaýı ortalyǵy retindegi rólin nyǵaıtýǵa yqpal etedi.
Eske sala keteıik, buǵan deıin elordada densaýlyq saqtaý, turaqty damý jáne medıtsınalyq týrızm máselelerine arnalǵan forým ótken bolatyn.
