Astana medıtsına ýnıversıtetine ulttyq mártebe berile me

ASTANA. KAZINFORM – Premer-mınıstr Oljas Bektenov Senat depýtattarynyń Astana medıtsına ýnıversıtetine ulttyq mártebe berý usynysyna jaýap berdi. 

– «Astana medıtsına ýnıversıteti» KeAQ-qa (budan ári – ýnıversıtet) «Ulttyq ýnıversıtet» mártebesin jáne akademık Tóregeldi Sharmanovtyń esimin berý máseleleri boıynsha saýaldy qarap, mynany habarlaımyn. Qazirgi ýaqytta ýnıversıtet eldegi jetekshi medıtsınalyq joǵary oqý oryndarynyń biri sanalady jáne medıtsınalyq bilim berý, ǵylym jáne klınıkalyq tájirıbe salasynda bedeli joǵary, - dedi Oljas Bektenov.

Úkimet basshysynyń dereginshe, ýnıversıtettegi stýdentterdiń jalpy sany 11 000-nan astam adamdy quraıdy. Onyń ishinde 20 elden kelgen 700-den astam sheteldik stýdent bar. Ýnıversıtet halyqaralyq jáne ulttyq reıtıngterde laıyqty oryndarǵa ıe. 

– Alaıda «Bilim týraly» Zańǵa sáıkes ýnıversıtetke ulttyq mártebe berý qosymsha qarajat bólýdi talap etedi. Bul rette respýblıkalyq jáne jergilikti bıýdjetterdiń shyǵystaryn josparlaý kezinde áleýmettik saladaǵy jańa bastamalarǵa bıýdjet qarajatyn bólýge moratorıı engizilgenin eskerip, bul máseleni keıinge qaldyrǵan jón dep paıymdaımyz. Óz kezeginde zańdy tulǵalarǵa ataý berý máselesi tıisti memlekettik onomastıkalyq saıasat sheńberinde qaralady jáne ýákiletti memlekettik organdardyń tıisti onomastıkalyq komıssııalarynyń qatysýymen júzege asyrylady, - dedi Premer-mınıstr.

Buǵan deıin senator Nurtóre Júsip Astana medıtsınalyq ýnıversıtetine ulttyq mártebe berýdi usynǵan edi.