Astana Media Week bıyl 10-shy ret ótedi
ASTANA. KAZINFORM – Elimizdiń medıa salasyndaǵy mańyzdy oqıǵalarynyń biri – «Astana Media Week» bıyl 10-shy ret uıymdastyrylady.
14-16 qazan aralyǵynda Astanada ótetin medıaplatformaǵa sheteldik jáne otandyq BAQ ókilderi, jýrnalıster, medıamenedjerler men kreatıvti ındýstrııa sarapshylary qatysady.
Osy jylǵy medıa aptalyqtyń basty taqyryby – «MEDIA. HUMAN. AI: 10 jyldyq transformatsııa. Senimniń jańa arhıtektýrasy». Úsh kúnge sozylatyn baǵdarlama aıasynda jasandy ıntellektiniń jýrnalıstıkaǵa, medıaǵa jáne kontent óndirisine yqpaly, tsıfrlyq qaýipsizdik, tehnologııalyq platformalardyń jaýapkershiligi jáne aýdıtorııa seniminiń ózgerýi sekildi taqyryptar talqylanady.
Іs-sharaǵa bedeldi álemdik jáne qazaqstandyq BAQ-tyń top-menedjerleri, memlekettik organdardyń ókilderi, Euronews, Meta, Tik-Tok jáne Q.AI kompanııalarynyń ókilderi, tanymal jýrnalıster men medıasarapshylar qatysady. Sondaı-aq Ázerbaıjan, Ózbekstan jáne Qyrǵyzstannyń medıa salasynyń ókilderi qatysatynyn rastady.
Ortalyq Azııanyń halyqaralyq aqparat keńistigindegi orny da medıa aptalyqtaǵy mańyzdy taqyryptardyń biri bolmaq. «Central Asia in English» redaktsııalyq zerthanasynda óńirdi jahandyq aýdıtorııaǵa tanystyrý jáne aımaqtyq ózindik medıa narratıvterin qalyptastyrý máseleleri qarastyrylady.
15 qazanda Qazaqstannyń kreatıvti ındýstrııasy, medıa naryqtaǵy ekonomıka, jarnamanyń jańa modelderi jáne aqparattyq saıasattaǵy ózgerister taqyryptary talqylanady. Baǵdarlamada praktıkalyq sheberlik sabaqtary qarastyrylǵan. Sonymen qatar, «Úzdik baspasóz hatshysy» jáne «Úzdik baspasóz qyzmeti» marapattary tabystalady.
16 qazanda medıa aptalyq Qazaqstan Media Awards saltanatty rásimimen qorytyndylanady.
Aıta keteıik, Prezıdent Teleradıokesheni men aǵylshyn tilindegi eń kóne The Korea Times basylymy medıaseriktestikti damytýǵa ýaǵdalasty.
