Astana Media Week 2026: úzdik baspasóz hatshylary men baspasóz qyzmetteri marapattaldy
ASTANA. KAZINFORM — Astanada ótip jatqan Astana Media Week 2026 medıa aptalyǵynyń ekinshi kúninde úzdik baspasóz hatshylary men baspasóz qyzmetteri marapattaldy. Sondaı-aq aqparattyq saıasat, otandyq kontent, jarnama naryǵy jáne medıada jańa tehnologııalardy qoldaný máseleleri talqylandy.
Bıyl «Úzdik baspasóz qyzmeti» atalymynda Qazaqstan Respýblıkasy Qarjylyq monıtorıng agenttiginiń baspasóz qyzmeti men Aqtóbe oblysy ákiminiń baspasóz qyzmeti jeńimpaz atandy.
Al «Úzdik baspasóz hatshysy» ataǵy QR Ekologııa jáne tabıǵı resýrstar mınıstrligi baspasóz qyzmetiniń jetekshisi Aınash Qoıshybaeva men Túrkistan oblysy ákiminiń baspasóz qyzmetiniń jetekshisi Mıra Súleımenovaǵa berildi.
Marapattaý rásiminen bólek, medıa aptalyqtyń ekinshi kúni salanyń ózekti máselelerine arnalǵan pikirtalastar men tájirıbelik kezdesýler ótti.
«Qazaqstannyń aqparattyq saıasatyndaǵy jańa erejeler» taqyrybyndaǵy kezdesýde memlekettik organdar men buqaralyq aqparat quraldary arasyndaǵy baılanys, baspasóz qyzmetteriniń jumysyn jetildirý jáne qoǵammen tıimdi qarym-qatynas ornatý máseleleri talqylandy.
Oǵan QR Mádenıet jáne aqparat birinshi vıtse-mınıstri Qanat Ysqaqov, Shyǵys Qazaqstan oblysy ákiminiń baspasóz qyzmetiniń jetekshisi Laýra Jaqypova, medıamenedjer Asqar Jaldınov, «Qazcontent» AQ basqarma tóraǵasy Ádil Seıfýllın jáne «Vlast» ınternet-jýrnalynyń Astana bıýrosynyń jetekshisi Tamara Vaal qatysty.
Al «Qazaq Creative Power: Qazaqstandyq vaıbty kim qalyptastyrady?» atty pikirtalasta shyǵarmashylyq ındýstrııa, medıa jáne kıno salasynyń ókilderi otandyq kontentti damytý, ony keń aýdıtorııaǵa tanytý jáne shyǵarmashylyq jobalardy ilgeriletý joldaryn qarastyrdy.
Pikirtalasqa QR Quryltaıynyń depýtaty Ashat Aımaǵambetov, Jibek Joly telearnasynyń basqarýshy dırektory Naǵashybek Aldan, jýrnalıst Jazıra Baıdaly, rejısser Ernar Almabek, kınorejısser Jandos Qusaıynov, Astana AI Film Festival negizin qalaýshy Aızatýlla Hýsseın jáne basqa da sarapshylar qatysty.
Medıa aptalyqta jarnama naryǵyndaǵy ózgeristerge de nazar aýdaryldy. «Jarnama medıa naryǵynyń jańa ekonomıkasy» atty strategııalyq sessııada TikTok, Nur.kz, Orda FM, Sport+ Qazaqstan jáne K Research Central Asia zertteý kompanııasynyń ókilderi tsıfrlyq platformalardyń damýy men medıakontentten tabys tabýdyń jańa joldaryn talqylady.
Baǵdarlamanyń tájirıbelik bóliginde Halyqaralyq aqparattyq tehnologııalar ýnıversıtetiniń prezıdenti Rústem Bıǵarı «Derekter ekonomıkasy: bıznes-analıtıka basqarý men sheshim qabyldaýdy qalaı ózgertedi?» taqyrybynda sheberlik sabaǵyn ótkizdi.
Sonymen qatar «Vaıbkodıng: medıanyń jańa tehnologııalyq saýaty» LIVE-zerthanasy men «Menshikti medıany damytýǵa arnalǵan Tik-Tok LIVE» sheberlik sabaǵy uıymdastyryldy. Qatysýshylar tsıfrlyq quraldardy paıdalaný, tehnologııalyq sheshimder ázirleý jáne tikeleı efır arqyly medıajobalardy ilgeriletý tásilderimen tanysty.
Aıta keteıik, Astana Media Week 2017 jyldan beri ótkizilip keledi. Medıa aptalyq memlekettik organdardyń, qazaqstandyq jáne sheteldik BAQ-tyń, tehnologııalyq kompanııalar men kásibı qaýymdastyqtyń ókilderin biriktiredi. Bıylǵy mereıtoılyq jıyn medıa salasyn damytýǵa, jasandy ıntellektini engizýge jáne kásibı baılanysty nyǵaıtýǵa baǵyttalǵan.
Buǵan deıin Astana Media Week forýmy 14-16 qazan aralyǵynda ótetinin habarlaǵan edik.
