Astana maıdangerlerine Jeńis kúnine oraı 1,5 mln teńgeden beriledi

ASTANA. QazAqparat – Jeńis kúnine oraı elordada turyp jatqan ardagerlerge 1,5 mln teńgeden beriledi. Bul týraly Astana qalasy Jumyspen qamtý jáne áleýmettik qorǵaý basqarmasynyń basshysy Ilıa Skýb aıtty, dep habarlaıdy QazAqparat tilshisi.

«Elordada byltyr Ekinshi dúnıejúzilik soǵysqa qatysqan 18 ardager bolsa, qazirgi kezde qalada 10 ardager turyp jatyr. 9 mamyrdy (Jeńis kúni) atap ótý aıasynda ardagerlerge qatysty tıisti áleýmettik kómek túrleri qarastyrylǵan», - dedi Ilıa Skýb Astana qalasy kommýnıkatsııalar qyzmetinde ótken baspasóz máslıhatynda.

Bul turǵyda ol ardagerlerge ákimdik birjolǵy tólem jasaıtynyn aıtty.

«Atap aıtqanda, Ekinshi dúnıejúzilik soǵysqa qatysqan ardagerlerge 1 531 150 teńge somasynda tólem aýdarylady», - dedi basqarma basshysy.

Budan buryn habarlanǵandaı, jaqynda QR Eńbek jáne halyqty áleýmettik qorǵaý mınıstri Tamara Dúısenova bıyl Ekinshi dúnıejúzilik soǵys ardagerlerine tıisti tólem aýdarylatynyn aıtty.

Qazirgi kezde elimizde 237 ardager bar.