Astana máslıhaty qalanyń 2030 jylǵa deıingi túzetý engizilgen Bas josparyn bekitti

Bul týraly ákimshilikten habarlady.

Jobanyń tanystyrylymyn jasaǵan Astana qalasynyń Bas jospary ǴZJI dırektorynyń orynbasary Baqtybaı Taıtalıev atap kórsetkendeı, 2001 jyly halyqaralyq yqpaldastyq jónindegi japondyq agenttik (ıAAMS) qalanyń Bas josparyn ázirlegen kezde, el qarqyndy damyp, elordanyń qurylysy jyldam júrip jatty. Soǵan oraı qala halqynyń sany arta túsip, qujatqa ózgerister engizý qajettigi týyndady.

Qalanyń balanstalǵan qajettiligin qamtamasyz etý úshin Bas josparda úsh basymdyqty baǵyt aıqyndalǵan: Astanany qala mańy aýmaqtarynyń damýynan ajyratpaý; qala tirshiligine qajetti quramdas retinde kólik ınfraqurylymyn damytý; qala aýmaqtaryn ıgerýde qalaqurylysy reglamentterin ornatý.

Engizilgen túzetýlerge sáıkes, Astananyń 30-60 shaqyrym radıýstaǵy qala mańy aımaqtary, qala qurylysymen retteletin erekshe aımaqtar retinde belgilendi. Osy qashyqtyqta ornalasqan eldi mekenderge deıin (Qorǵaljyn, Pavlodar, Kókshetaý, Qostanaı, Qaraǵandy, Ereımentaý, Qosshy, Maıbalyq tas joldary) «úsh paralleldi kóshe» salynatyn bolady. Ortalyq - birinshi kóshe qoǵamdyq kólikterge arnalǵan, qalǵan ekeýi - janama kósheler.

Qala ishinde sondaı-aq, qoǵamdyq avtobýstardan jeńil relsti kólikke qaıta otyrýǵa bolatyn bes termınal qurylady. Oǵan avtokólikterdiń kópdeńgeıli parkıngi men velosıped beketteri kiredi.

Úzdiksiz qozǵalysqa arnalǵan kishi aınalma magıstral, qalanyń ortalyq kóshelerimen aınalyp ótip, alty aýdandy biriktiredi. Olar keıin estakadalar men joldardyń qurylysy barysynda jalpy qalalyq jáne aýdandyq mańyzdaǵy magıstraldi kóshelermen túıisetin bolady.

Onymen birge, qala ortalyǵynda ornalasqan ónerkásiptik, kommýnaldyq-qoıma nysandary men eski jer úıler ysyrylyp, olardyń ornyna Bas josparǵa sáıkes, kópqabatty úıler turǵyzylatyn bolady.