Astana Marathon 2021-ge vaktsına alǵan jelaıaqtar ǵana qatysa alady

NUR-SULTAN. QazAqparat – Elordada 26 qyrkúıek kúni jyl saıynǵy Astana Marathon 2021 halyqaralyq marafony ótedi. Bıyl jarys Qazaqstan Respýblıkasy Táýelsizdiginiń 30 jyldyǵyna oraılastyrylyp otyr, dep habarlaıdy QazAqparat qala ákimdiginiń resmı saıtyna silteme jasap.

Marafondy Dene shynyqtyrý jáne sport basqarmasy uıymdastyrady. Aıta keteıik, Nur-Sultan qalasynyń Bas memlekettik sanıtarlyq dárigeriniń qaýlysyna sáıkes, buqaralyq, sonyń ishinde sporttyq is-sharalardy ótkizýge tyıym salynady. Sondyqtan bıylǵy jarysqa qatysýshylar sany shekteýli bolmaq. Al KVI-ge qarsy vaktsınatsııadan ótken jelaıaqtarǵa qatysýǵa ruqsat etiledi (vaktsınatsııa tek eresek qatysýshylar úshin).

Astana Marathon 2021 aıasynda eki qashyqtyq kózdeledi: 18 jáne odan joǵary jastaǵy qatysýshylar úshin 42,2 km, al 16 jáne odan joǵary jastaǵy qatysýshylar úshin 10 km (tek kámeletke tolǵan adamdar ǵana vaktsınatsııalanady). Marafonǵa qatysý úshin tirkelýdi 23 qyrkúıek saǵat 00:00-ge deıin www.astana42k.com saıtynan onlaın ótýge bolady.

Aıta ketý kerek, bıylǵy marafon qatysýshylar úshin erekshe bolmaq, óıtkeni bıyl ol «qola» statýsyna ıe.

Bronze Label Road Races 2019 jylǵy qarashada World Athletics uıymy tarapynan berilip, TMD aýmaǵynda Astana Marathon osyndaı statýsqa ıe bolǵan alǵashqy jáne jalǵyz marafon jasady. 2018 jyldan bastap Astana Marathon Halyqaralyq marafondar men jelaıaqtar qaýymdastyǵynyń (AIMS) múshesi, 2020 jyldan bastap Abbott World Marathon Majors Wanda Age Group jas erekshelik toptarynda marafonnan álem chempıonatynyń biliktilik marafondar tobyna endi.

Esterińizge sala keteıik, bul báseke qaıyrymdylyq sharasy bolyp sanalady. Osylaısha, 2009 jyldan bastap Astana Marathon uıymdastyrýshylary qazaqstandyq qaıyrymdylyq uıymdary úshin 37 mln teńgeden astam qarajat jınady.