Astana marafonynda júgirgen úlken otbasylar men jas jubaılar syılyq alady

ASTANA. QazAqparat - 27 tamyz kúni ótetin Astana Halyqaralyq marafonynda «Úlken otbasy», «Jas jubaılar» nomınatsııalary boıynsha  arnaıy syılyqtar qarastyrylǵan. Ol úshin otbasy músheleri nemese jas jubaılar birigip úsh dıstantsııanyń birin eńserýi tıis: 2017 metr, 10 km nemes 42 km 195 metr, dep habarlaıdy ortcom.kz.

Bul týraly Ortalyq kommýnıkatsııalar qyzmetinde Shanhaı yntymaqtastyq uıymy men  Azııadaǵy ózara yqpaldastyq jáne senim sharalary jónindegi keńestiń Astana Halyqaralyq marafonyna arnalǵan baspasóz máslıhatynda belgili boldy. Baspasóz jıynyna qatysqan  ShYU bas hatshysy Rashıd Álimov sharanyń «Shanhaı otbasyna» kiretin memleketterde ǵana emes, basqa da elderde qyzyǵýshylyq týdyrǵanyn aıta kelip, marafon dástúriniń jalǵasatynyn jetkizdi.

«Bul Astanaǵa besinshi ret kelýim. Ár saparymda erte turyp, qalany jaıaý aralaımyn. Taza aýa, keńistik - munyń  bári adamǵa erekshe kóńil-kúı syılaıdy. Al halyqaralyq marafonnyń Qazaqstan astanasynda ótýi memleketter arasyndaǵy ózara dostyqty, salaýatty-ómir saltyn nasıhattaıdy dep senemin», - dedi ShYU bas hatshysy.

Spıkerdiń aıtýynsha sharaǵa «TASS», «SınHýa» halyqaralyq aqparat quraldary qoldaý bildiredi. Al elimizdiń memlekettik arnalary marafonnyń ashylý saltanaty men marapattaý rásimin tikeleı efırden kórsetedi.

ShYU alǵashqy marafony 2016 jyly ótkizildi. Oǵan tórt qurlyqtan 15,6 myń adam qatysty. Marafon ShYU qurylýyna 15 jyl tolýyna oraılastyryldy.