Astana marafonyna tanymal nemis jelaıaǵy Stefan Shlett keledi
ASTANA. QazAqparat - Jyl saıynǵy Astana marafonyna 12 eldiń sportshylary qatyspaq, olardyń arasynda tanymal germanııalyq jelaıaq Stefan Shlett te bar. 54 jastaǵy sportshy 700-den astam marafonnyń arasynan tabylǵan.
Esterińizge sala keteıik, shilde aıynda QR Premer-Mınıstri Kárim Másimov óziniń tvıtterinde Úkimet músheleri qyrkúıektegi Astana Marafonyna qatysýdy josparlap otyrǵanyn habarlaǵan edi.
Atalǵan jarysqa baılanysty 4 qyrkúıekte tańǵy saǵat 8-den 14:00-ge deıin Astanada birqatar kóshelerde qozǵalys shektelip, osy rette Orynbor kóshesimen, Respýblıka, Turan, Abylaı han dańǵyldary arqyly jáne basqa da joldarmen marafonshylar júgirip ótpek. Jarys «Han Shatyrdan» bastalyp, sol jerden aıaqtalady.
Búgin Ortalyq kommýnıkatsııalar qyzmetinde ótken baspasóz máslıhatynda Astana Marafonyn uıymdastyrýshysy jáne negizin qalaýshy Gaýhar Bramleı-Fenton osyndaı baǵdar qonaqtarǵa Astanany barynsha kórsetýge múmkindik beretinin atap ótti. Onyń paıymynsha, qazirgi zamanǵy marafondar týrızmdi damytýdyń balamaly joly.
Belgili bolǵandaı, sharaǵa qatysýshylar úshin Býrabaıǵa jáne elordaǵa jaqyn ornalasqan «ALJIR» murajaıyna saparlar josparlanyp otyr.
Atap aıtqanda, osy qaıyrymdylyq marafony elordada 2009 jyldan beri dástúrli túrde uıymdastyrylýda. Marafon qashyqtyǵy Astanadaǵy Esil, Almaty jáne Saryarqa aýdandaryn qamtyp otyr. Osy rette sporttyq shara 4 sanatta ótedi, ıaǵnı 42,2 shaqyrym, 21,1 shaqyrym, 10 shaqyrym, sondaı-aq estafetalyq júgirýler eskerilip otyr. Búginde sharaǵa AQSh, Brazılııa, Germanııa, Ulybrıtanııa jáne basqa da elderdiń ókilderi qatysýǵa nıet bildirýde. Jalpy alǵan 5 myńnan astam adam júgiredi dep kútilýde. Sharaǵa qatysý úshin 3-7 myń teńge aralyǵyndaǵy somany tóleý kerek. Onyń qunyna júgirýshige arnaıy paket tabystalady jáne jeńil jeıde, jyrtylmaıtyn qaǵazdan jasalǵan nómir, sondaı-aq basqa da qajetti zattar usynylady.
Bul marafon qaıyrymdylyq jarys bolyp tabylatyndyǵy belgili. 2009 jyldan beri 24 mln. teńge jınalyp, túrli qaıyrymdylyq uıymdarǵa qoldaý jasaldy.
Gaýhar Bramleı-Fentonnyń sózine qaraǵanda, Astana Marafon-2016 jarysynyń qatysýshysy ataný úshin bastapqy jarnany tóleý qajet. Tirkelýdiń eki tásili bar. Birinshisinde - astana42k.com saıtynda onlaın rejimmen qosylýǵa bolady. Al ekinshi tásili arnaıy belgilengen oryndarda júzege asyrylady. Nıet bildirgender Krossfıt Astana klýbtarynyń birine kelip, qolma-qol jarnany engizý jolymen tirkeledi.
