«Astana marafony» kásipqoılar men áýesqoılardyń basyn biriktiredi
«Astana marafony» buqaralyq júgirý sharasynyń basty uıymdastyrýshysy Gaýhar Bramleı-Fentonnyń aıtýynsha, Qazaqstannyń elordasynda osyndaı shara ótkizý ıdeıasy Londonda The Royal Parks Half-Marathon jartylaı marafony barysynda týǵan. Ótken jyly elordada 42 km 195 m qashyqtyqqa júgirýden marafon ótkizilgen bolatyn.
Bıylǵy marafonǵa qatysýshylar 42,2 shaqyrym, 21,1 shpaqyrym jáne 10 shaqyrym qashyqtyqtardy baǵyndyrady.
- Jańalyqtardyń biri - estafeta, tórt atlet marafondyq qashyqtyqty (42,2 shaqyrym) júgirip ótedi. Astanalyqtar bir kúnge kólikterin qoıyp, aýanyń tazarýyna múmkindik beretinine úmittenemiz. Ózderi júgirmese de, kóshege shyǵyp, qatysýshylarǵa qoldaý kórseter. Onyń ústine, bıyldan bastap belgili bir júgirýshige qoldaý kórsetkisi keletinder «Júgirýshini baqyla» betinde tirkelip, áleýmettik jelilerden nemese SMS arqyly jarys nátıjelerin bile alady, - deıdi uıymdastyrýshy.
Gaýhar Bramleı-Fenton bıylǵy marafonnyń kásipqoılar men áýesqoılardyń basyn biriktiretinin atap ótti.
- Biz júgirýdi keńinen nasıhattaımyz. Adamdar únemi jattyǵý jasap, salaýatty ómir saltyn ustanýy kerek. Sondyqtan tórtinshi qırkúıekte jarysqa qatysatyn klýbtardyń múshelerine 20% jeńildik (kem degende 5 adam) jasalady.
Aıta keteıik, marafon ádeıi salqyn kezde ótkiziledi. Sharaǵa 18 jastan asqandar qatysady.
- Menińshe, qashyqtyqty bir apta daıyndalyp, júgirip ótýge bolady, biraq onyń densaýlyq úshin saldary bar. Óz kúshińdi durys jumsaı bilý kerek. Jaıaý júrýge de bolady, biraq qashyqtyqty alty saǵatta baǵyndyra almaǵandar jarystan shettetiledi, - dedi ol.
Bıyl marshrýt Esil, Almaty jáne Saryarqa aýdandaryn qamtıdy. Osylaısha, marafonǵa qatysýshylar qashyqtyqty baǵyndyrý kezinde Astananyń barlyq kórikti jerlerin kóre alady.
Eske salaıyq, marafonǵa qatysý úshin astana42k.com resmı saıtynda onlaın rejımde nemese Krossfıt Astana klýbtarynda tirkelý kerek. Jınalǵan qarjy qaıyrymdylyq qorlarǵa aýdarylady.
- Marafon - bul árqashan da óz-ózińdi jeńý jáne kókjıegińdi keńeıtý múmkindigi. Ol umytylmas áser qaldyrady, jańa dostar tabasyń. Marafonda jasyna, ultyna jáne áleýmettik statýsyna qaramastan bári teń bolady. Qala úshin bul mereke, týrıster tartýdyń tıimdi platformasy. 4 qyrkúıek densaýlyqqa, sportqa jáne qaıyrymdylyqqa arnalady, - deıdi Gaýhar Bramleı-Fenton.