Astana marafony: Ádilbek Jaqsybekov 42,2 shaqyrymdyq qashyqtyqty eńserdi
ASTANA. QazAqparat - Elordada qaıyrymdylyq maqsattaǵy halyqaralyq Astana marafonynda 42,2 shaqyrymdyq qashyqtyqtan ótken QR Prezıdenti Ákimshiliginiń basshysy Ádilbek Jaqsybekov máre syzyǵynan ótti.
«Shynyn aıtsam, 42,2 shaqyrymdy baǵyndyrý ońaı emes, ıaǵnı aldymen jaqsy daıyndyq kerek. Osy rette barshasyna aldyn ala daıyndalýǵa keńes beremin. Júgirý barysynda toqtaýǵa nıet boldy, biraq sońyna deıin jetý maqsatyn qoıdym. Atap aıtqanda, búgingi marafon óte jaqsy shara retinde este qalady, bes myńǵa jýyq adam jarysqa qatysty. Shet elderden kóptegen adamdar kelgeni belgili»,-dedi Á. Jaqsybekov.
Bul turǵyda ol osyndaı sharalar jastardy sportqa baýlýǵa, densaýlyqqa jaqsy bastama ekendigine toqtalyp ótti.
«Marafondy uıymdastyrýshylarǵa alǵysymdy aıtamyn. Báseke deńgeıi jaqsy oılastyrylǵan. Memleket basshysy sporttyń damýyna erekshe mán berip otyr. Sondyqtan osyndaı marafon kerek dep esepteımin. Jalpy biz Elbasymyzdy qoldap, sportpen aınalysyp, elimizdi súıip, sporttyq jáne eńbek marafonyna belsendi qatysýymyz qajet»,-dedi Á. Jaqsybekov.
QR Prezıdenti Ákimshiliginiń basshysy 42,2 shaqyrymdyq qashyqtyqty 4 caǵat 22 mınýtta júgirip ótti.
