«Astana marafon-2017» jeńimpazy 850 myń teńge alady
ASTANA. QazAqparat - «Astana marafon-2017» jeńimpazy 850 myń teńge alady. Jarysqa qatysý úshin 15 elden ótinish kelip túsken, dep habarlady elordalyq ákimdiktiń medıa ortalyǵy.
Jarysqa Ulybrıtanııa, AQSh, Ýkraına, Ispanııa, Reseı, Polsha, Nıderlandy, Malaızııa, Qytaı, Qyrǵyzstan, Kenııa, Italııa, Úndistan, Germanııa men Avstrııa syndy elderden sportshylar qatysady.
«42,2 shaqyrym qashyqtyqqa astanalyq marafon boıynsha júlde qory bekitildi. Jeńimpaz (áıel ne er adam) 850 myń teńge kóleminde aqshalaı syıǵa ıe bolady», dep habarlady medıa ortalyq tilshisine «Astana marafon» dırektory Gaýhar Bramleı-Fenton.
Bıyl marafon elordada, 17 qyrkúıekte ótedi. Sportshylar 3 qashyqtyqta ózara synǵa túsedi. Atap aıtqanda, 42,2 shaqyrym - bul eń tózimdiler úshin, 21,1 shaqyrym - daıyndyǵy myqty sportshylar úshin, áýesqoılar úshin - 10 shaqyrym.
Onymen birge marafon aıasynda skandınav jaıaý júrý túri boıynsha jarys qarastyrylǵan.
Sharaǵa álemge tanymal Kenııalyq júgirýshiler qatysady dep kútilýde. Olardyń ishinde Saımon Kıprýgýt Kırýı, Genrı Kıpsang jáne Cheboı Hılda Djepkogeı bar.
Marafon 17 qyrkúıekte, EKSPO kórmesine qarama-qarsy ornalasqan R4 kólik turaǵy aýmaǵynan bastalady.
