Astana mańyndaǵy jasyl beldeýge 500 myńǵa jýyq kóshet otyrǵyzylady

ASTANA. QazAqparat – Astanada jasyl beldeýdegi kóshetter sany artyp, káriz tazartý qurylystary (2-KTQ) salynady. Premer-Mınıstrdiń birinshi orynbasary Roman Sklıar, Astana qalasynyń ákimi Jeńis Qasymbek, Aqmola oblysynyń ákimi Ermek Marjyqpaev qalamen shekaralas aýmaqty áýeden baqylady, dep habarlaıdy QazAqparat Úkimet saıtyna silteme jasap.

Mańaıdy tikushaqpen aralaý barysynda Maıbalyq kóliniń, Preobrajensk sý torabynyń jáne t.b. kólemi naqtylandy.

Jańa aýyz sý stansasynyń (3-SSS) paıdalanýǵa berilýin jáne sý tutyný kóleminiń kóbeıgeni eskerile otyryp, qalaǵa sý burý kólemi artty. Tazartý qurylystarynyń (1-KTQ) qýaty jetkiliksiz, sondyqtan osy jyldyń kúzinde ekinshi káriz tazartý qurylysy (2-KTQ) bastalady. Bul ǵımarattyń qýaty táýligine 200 myń tekshe metre bolmaq.

Sondaı-aq, aralaý barysynda «Astana-Kógaldandyrý qurylysy» JShS-ge qarasty tálimbaqqa bardy. Onyń aýdany 350 gektarǵa jýyq, ártúrli aǵash túrleriniń kóshetteri ósiriledi. Tálimbaq jyl saıyn 30 myń dana kóshet bere alady. 2025 jyldan bastap aǵash tuqymdarynyń 100 myń kóshetine, tamyr júıesi jabyq 45 myń butaǵa jáne tamyr júıesi ashyq 300 myń butaǵa deıin kóbeıtiledi dep josparlanyp otyr.

Sondaı-aq, jyl saıyn jasyl beldeýdegi kóshetter sany artyp keledi. Mysaly, bıyldyń ózinde tek jasyl beldeýde 500 myńǵa jýyq jasyl jelek (aǵashtar, butalar jáne t.b.) otyrǵyzý josparlanyp otyr. Qalanyń ózinde osy kólemde jasyl jelek otyrǵyzylmaq. Elordanyń jasyl beldeýiniń jalpy aýdany – 15 myń gektar. Onda 11,5 mln astam aǵash pen 2 mln buta ósedi. Negizinen japyraqty aǵash túrlerine basymdyq beriledi.