Astana mańyndaǵy órt 50 gektarǵa deıin ulǵaıdy – ákim men mınıstr oqıǵa ornynda
ASTANA. QazAqparat – Elorda mańyndaǵy órtti sóndirýge kórshiles aımaqtardan órt sóndirýshiler men tehnıka kómekke keldi, dep habarlaıdy QazAqparat qalalyq TJ departamentine silteme jasap.
«Astana qalasy TJD Órt sóndirý bólimsheleri aldyn ala boljam boıynsha 50 gektar aýmaqta qurǵaq shóp órtin sóndirýdi jalǵastyrýda. Qorǵanys mınıstrliginiń tikushaqtary 18 ret – 63 tonnadan astam sý shashty. QR Tótenshe jaǵdaılar mınıstri Syrym Sháriphanov pen Astana qalasynyń ákimi Jeńis Qasymbek órtti sóndirýdi úılestirý úshin sol jerde júr», - dep jazylǵan TJD habarlamasynda.
Sonymen birge, elordalyq órt sóndirýshilerge kómekke Aqmola oblysynyń jeke quramynan 18 adam, 5 tehnıka jáne Qaraǵandy oblysynan 5 tehnıka men 25 adam kómekke shyqty.
Buǵan deıin Qorǵaljyn tasy joly men Qosshy qalasyna qaraı aınalma joldyń arasynda qýraǵan aǵashtyń órtenip jatqanyn habarlaǵan edik.
Saldarynan Astana kóshelerin tútin basyp, dárigerler kóshege shyqpaýǵa shaqyrdy.
Qazgıdromet RMK Astanadaǵy aýa sapasyna tekserý júrgizip, azot oksıdi men azot dıoksıdi shamadan tys artqanyn habarlady.
