Astana mańyndaǵy qurylys kompanııalary paıdaly qazbalardy óndirýge kelisim jasaýy tıis
ASTANA. QazAqparat - Astana qalasynyń mańyndaǵy barlyq qurylys kompanııalary jer qoınaýyn paıdalanýshylarmen paıdaly qazbalardy óndirýge nemese barlaýǵa kelisim jasasýy tıis. Bul týraly astana.kz saıtyna qalalyq Tabıǵı resýrstar jáne tabıǵat paıdalanýdy retteý basqarmasynan habarlady.
Astana qalasynyń tabıǵı resýrstar jáne tabıǵat paıdalanýdy retteý basqarmasy 2012 jylǵy 11 mamyrdaǵy Astana qalasy aýmaǵynda jalpyǵa taralǵan paıdaly qazbalardy barlaý nemese óndirýge jer qoınaýyn paıdalaný quqyǵyn berý boıynsha Vedomstvoaralyq komıssııanyń №2 hattamalyq sheshimine sáıkes, 2012 jyldyń 12 mamyrynan Astana qalasy aýmaǵynda jalpyǵa taralǵan paıdaly qazbalardy barlaý nemese óndirýge jer qoınaýyn paıdalaný quqyǵy berilmeıdi jáne konkýrstar ótkizilmeıtinin habarlaıdy. Osyǵan baılanysty, barlyq qurylys kompanııalaryna, bas merdigerlerge Astana qalasy mańynda ornalasqan jalpyǵa taralǵan paıdaly qazbalardy barlaý jáne óndirýge kelisimsharttary bar jer qoınaýyn paıdalanýshylarmen kelisim jasasý qajet. «Aıta keteıik, eseptik kezeńde Astana qalasy aýmaǵynda jalpyǵa taralǵan paıdaly qazbalardy zańsyz óndirýdiń 5 faktisi toqtatyldy. Zańsyz óndirilgen jalpyǵa taralǵan paıdaly qazbalardyń jalpy kólemi 5512 m3 qurady. Astana qalasynan 40 shaqyrym radıýsta ornalasqan kenishterdi óńdeıtin uıymdarmen jer qoınaýyn paıdalanýǵa kelisimsharttary bar jer qoınaýyn paıdalanýshylardyń tizimi elordalyq Tabıǵı resýrstar jáne tabıǵat paıdalanýdy retteý basqarmasynyń saıtynda usynylǵan» delingen habarlamada.
