Astana mańyndaǵy eldimekender Naýryz merekesin toılap jatyr

ASTANA. QazAqparat - «Jeleznodorojnyı» jáne «Promyshlennyı» turǵyn alaptarynda Ulystyń uly kúni Naýryz meıramyn toılaý bastaldy. Jınalǵan qaýym merekelik kontsert tamashalap, toǵyzqumalaq pen asyq atý oıyndarynda sheberlik baıqasty, ulttyq taǵamdardan dám tatyp, kıimder kórmesin tamashalady, dep habarlaıdy QazAqparat.

Kontserttik baǵdarlamany Astana qalasynyń Mádenıet jáne sport basqarmasy uıymdastyrdy. Klara Tólenbaeva, Dos, «Art-Dombyra» jáne «Alaman»trıolary, «Saryarqa» jáne «Dıart» toptary, «Іnkárim» bı ansambli, «Shabyt» halyqaralyq shyǵarmashyl jastar festıvaliniń Gran-prı ıegeri Jaqsykeldi Maıasarov jáne basqa da qazaqstandyq estrada juldyzdary kelýshilerge kóterińki kóńil kúı syılaıdy. Sonymen qatar, Promyshlennyı turǵyn alabynyń «Zamandastar» ardagerler horynyń solısteri merekege arnaıy daıyndaǵan shyǵarmalaryn oryndady. Budan basqa, anımatorlar men boıshań qýyrshaqtardyń qatysýymen balalarǵa arnalǵan ınteraktıvti oıyn-saýyq uıymdastyryldy, toǵyzqumalaq pen asyq atý jarystarynyń jeńimpazdary estelik syılyqtarmen marapattaldy.

Promyshlennyı turǵyn alabynyń qurmetti turǵyny, «Zamandastar» ardagerler horynyń bas solısi Jeńis Beısembaev qala turǵyndaryn kóktemgi merekemen quttyqtady:

- Qurmetti astanalyqtar, Promyshlennyı turǵyn alabynyń turǵyndary! Sizderdi Naýryz merekesimen quttyqtaımyn! Barshańyzǵa baq-bereke, molshylyq, baqyt pen bar jaqsylyqty tileımin. Qazaqstan, alǵa! - dedi ol.

Eske salaıyq, turǵyn alaptarynda Naýryz meıramyna oraılastyrylǵan halyqtyq serýender jalǵasyn tabady. 21 naýryzda saǵat 11.00-de Prıgorodnyı jáne Úrker, al 22 naýryzda saǵat 11.00-de Kazgorodok, Óndiris, Kóktal-1 jáne Kóktal-2 kentterinde Ulystyń uly kúnine arnalǵan merekelik sharalar ótedi. Al Internatsıonalnyı jáne Mıchýrıno turǵyn alaptarynda merekelik kontsert 18 naýryzda bolyp ótti.