Astana mańyndaǵy eldi mekenderge 2019 jyldyń sońyna deıin tolyq alfalt tóseledi
ASTANA. QazAqparat - Astana qalasynda jańadan salynyp jatqan jol obektilerin aralaý barysynda Astana qalalyq jolaýshylar kóligi jáne jol-kólik ınfraqurylymy basqarmasynyń jetekshisi Ashat Qaraǵoıshın 2019 jyldyń sońyna deıin elorda mańyndaǵy eldi mekenderge tolyqtaı asfalt tóseletindigin aıtty, dep habarlaıdy QazAqparat tilshisi.
Búginde Astana mańyndaǵy eldi meken turǵyndaryna ómir súrý jaǵdaıymen qatar qalamen qarym-qatynas úshin jol salý jumystary qarqyndy júrýde.
«Qala mańyndaǵy eldi mekender alys-jaqyndyǵyna qaramastan asfalttalǵan jolmen qamtylýy tıis. Bul jospardy 2019 jyldyń aıaǵyna deıin bitirýdi kózdep otyrmyz. Ótken jyly qala mańyndaǵy Ilınka, Kóktal, Ońtústik-Shyǵys aýdandarynda barlyǵy 145 kóshe salynyp, paıdalanýǵa berildi», - dedi Ashat Qaraǵoıshın.
Sonymen qatar, ústimizdegi jyly taǵy 50 kóshe salynatynyn, onyń 15-i bitip, taǵy 10 kóshe salyný ústinde ekenin jetkizdi.
«Astana ishi jáne mańy boıynsha taǵy 150 kóshe asfalttalýy kerek, qala ákimi keler jyldyń sońyna deıin bitirý kerektigin tapsyrdy. Ortasha eseppen bir kósheniń uzyndyǵy 400 metrdi, eni 7 metrdi quraıdy, ony salýǵa 15 kún ýaqyt jumsalady. Bir kósheniń quny 50 mln teńgeni quraıdy», - dedi basqarma basshysy. 
