Astana mańyndaǵy eldi mekenderde balabaqsha oryndary kezeksiz beriledi
ASTANA. QazAqparat - Astana qalasy mańyndaǵy eldi mekenderde balabaqshalarǵa oryndy kezeksiz alýǵa bolady.
Mundaı jeńildik qala shetinde turatyn turǵyndarǵa ǵana qarastyrylǵan, dep habarlaıdy QazAqparat elorda ákimdiginiń medıa ortalyǵyna silteme jasap.
Bilim berý basqarmasy basshysynyń mindetin atqarýshy Ánýar Jańǵozınniń aıtýynsha, ol úshin www.e.astana.kz portalynda «Eldi mekenderdegi balabaqshany tańdaý» jeke fýnktsııasy engizilgen.
«Qala shetinde, ıaǵnı, Ilınka, Prıgorodnyı syndy eldi mekenderde ornalasqan balabaqshalarda balalardy qabyldaý baıaý júrgizilýde. Óıtkeni ondaǵy balabaqshalar sol aýdannyń turǵyndary úshin ǵana qajet. Sáıkesinshe, biz olarǵa jalpy kezek sanyn kútip qalmaýlary úshin jeke qyzmet kórsetemiz. Biraq, bul jekelegen aýdandarda ornalasqan balabaqshalarǵa ǵana qatysty», - dedi Á.Janǵozın.
Búǵan deıin habarlanǵandaı, 2017 jyly Astanada memlekettik balabaqshalarǵa 6310 oryn bólindi. Bul rette, memlekettik balabaqshalardaǵy jalpy bos oryndar qataryna qala mańyndaǵy eldi mekenderdegi bos oryndardyń sany da kirgen.
«2017 jylǵa bólingen 6310 orynnyń jartysynan kóbi tapsyryldy. Nege barlyǵy emes? Sebebi biz ata-analarǵa habarlandyrýlardy sms nemese elektrondy poshta arqyly jiberemiz, alaıda, barlyǵy birdeı ol habarlandyrýdy ala bermeıdi. Keıbiri qonystaryn aýystyryp jibergen, endi basqalary jeke menshik balabaqshalarǵa baryp júr jáne basqa da sebepterge baılanysty balabaqshadaǵy oryn olarǵa kerek bolmaı qalady. Sáıkesinshe, bos oryndardy berý merzimin tezdetý úshin biz endi kútý ýaqytyn 15-ten 5 jumys kúnine deıin qysqartamyz», - dedi Á.Janǵozın.
Onyń aıtýynsha, 15 jumys kúni boıynsha kútý merzimi mektepke deıingi mekemelerdegi qabyldaý úderisin baıaýlatady. Kelesi kezekte turǵan balalardyń ata-analary taǵy jarty aılap kútýlerine týra keledi.
