Astana mańyndaǵy eldi mekender qalaı damýda
KÓKShETAÝ. QazAqparat - Astananyń gúldenýi irgedegi eldi mekenderdiń damýyna úlken serpin berýde. Bul týraly óńirlik kommýnıkatsııalar qyzmetinde ótken brıfıngte Shortandy aýdanynyń ákimi Gúlnur Sádýaqasova málim etti, dep habarlaıdy QazAqparat tilshisi.
Astana aglomeratsııasyna engen eldi mekenderdiń problemasyn sheshý joldary saralanǵan brıfıngte aýdan ákimi halyqtyń ál-aýqatyn jaqsartý, eldi mekenderdi damytý boıynsha atqarylyp jatqan sharýalarǵa toqtaldy.
Ákiminiń sózinshe, Astana aglomeratsııasyna Shortandy aýdanyndaǵy Tóńkeris, Bozaıǵyr jáne Klıýchı eldi mekenderi enip otyr. Osynyń arqasynda aýdanda ınjenerlik kommýnıkatsııa men áleýmettik ınfraqurylymdy damytý, turǵyndardy sý jáne elektrmen qamtamasyz etý, jol qurylysy boıynsha joǵary kórsetkishterge qol jetkizilip keledi.
«Aýdanda ınjenerlik kommýnıkatsııa salasynyń damýyna asa kóńil bólinýde. 2010 jyldan beri turǵyndardy sapaly aýyz sýmen qamtamasyz etý maqsatynda Tóńkeris jáne Bozaıǵyr aýyldarynda sýqubyry júıesi qalpyna keltirilýde. Oǵan qosa, bıylǵa jyly Bozaıǵyr aýylynda 84 ýchaskede uzyndyǵy 6 shaqyrym sý qubyrynyń qurylysy jobasy úshin qarjy bólindi. Klıýchı aýylynyń turǵyndaryn sapaly aýyz sýmen qamtamasyz etý maqsatynda ótken jyly sý sorǵysh, súzgi, júıelik qondyrǵylaryn aýystyrdyq. Qazirgi kezde, «Shortandy sý» kommýnaldyq kásiporny jer asty sý sorǵyshtaryn aýystyrý jumystaryn jalǵasyrýda», - dedi Gúlnur Sádýaqasova óz sózinde.
Sonymen qatar, aýdan ákimi 2017 jyly Bozaıǵyr jáne Klıýchı aýyldarynyń kóshelerine kúrdeli jóndeý jumystaryn júrgizý úshin qajetti qujattardyń ázirlengenin atap ótti. Osymen birge, Bozaıǵyr aýylynyń turǵyndaryn úzdiksiz elektrmen jabdyqtaý máselesi de oń sheshilip jatqandyǵy aıtyldy. Jalpy aýdanda, áleýmettik nysandardyń qurylysyna erekshe kóńil bólingen.
«Mektepke deıingi balalardy bilim berýmen qamtamasyz etý jolynda Tóńkeris jáne Bozaıǵyr aýyldarynda 140 oryndyq eki balabaqsha salý úshin jobalyq-smetalyq qujattary ázirlendi. Bıyl Tóńkeris jáne Klıýchı aýyldarynda medıtsınalyq pýnkti salý josparda bar. Jalpy, aýdannyń ózge eldi mekenderin esepke alǵanda áleýmettik-ekonomıkalyq damý kórsetkishinde oń dınamıka bar», dep sózin túıindedi aýdan ákimi.
