Astana mańyndaǵy azyq-túlik beldeýiniń qurylýynyń arqasynda ımport úlesi - 20 paıyzǵa tómendedi - I. Tasmaǵambetov
ASTANA. 22 sáýir. QazAqparat - Astana mańyndaǵy azyq-túlik beldeýiniń qurylýynyń arqasynda ımport úlesi - 20 paıyzǵa tómendedi. Bul týraly búgin Táýelsizdik saraıynda ótip jatqan elordany budan ári qaraı damytýǵa arnalǵan jıynla elorda ákimi Imanǵalı Tasmaǵambetov málim etti.
«Astana qalasy mańyndaǵy azyq-túlik beldeýin qurý - syrtqy ımport úlesin 72 paıyzdan 52 paıyzǵa deıin tómendetýge múmkindik berdi. 2012 jyly jalpy qýattylyǵy jylyna 2,5 myń tonnalyq ónimge arnalǵan 2 jylyjaı kesheni paıdalanýǵa berildi. Sonymen qatar, ónimdiligi jylyna 3,5 myń tonnadan asatyn 3 jylyjaı jobalanýda. Bul nysandar tolyq kúshine engende 2013 jyly jylyjaı ónimderine degen (qııar, qyzanaq) maýsymaralyq qala suranysynyń 80 paıyzyn jabady»,-dedi elorda ákimi.
Onyń sózine qaraǵanda, búginde elorda aýmaǵynda 5 kókónis saqtaý qoımasy jumys istep jatyr. Olardyń jalpy saqtaý kólemi 23 myń tonna shamasynda. Budan bólek jalpy saqtaý kólemi 50 myń tonnaǵa jýyq 9 joba qurylys satysynda tur. Paıdalanýǵa berilgen kezde 2013 jyly qala suranysyn 100 paıyzǵa qamtıdy.
«Saýda logıstıkasyn damytýda aýyl sharýashylyǵy ónimderiniń kóterme naryǵy men kólik logıstıkalyq ortalyǵynyń qurylysy salynýda»,-dedi I. Tasmaǵambetov.
