Astana mańyndaǵy aýyldar kúshti jelden soń jaryqsyz qaldy
ASTANA. QazAqparat - QR ІІM Tótenshe jaǵdaılar komıteti seısenbi, 22 mamyr kúni bolǵan kúshti jelden soń Astana men Aqmola oblysyndaǵy jaǵdaı týraly málimetterdi jarııalady, dep habarlaıdy QazAqparat.
Komıtet taratqan málimetterge qaraǵanda, Astanada 22 mamyr kúni saǵat 13.15 pen 13.20 mınýt aralyǵynda kúshti jeldiń saldarynan (sekýndyna 21 metr) ǵımarattarǵa zııan keltirý men olardyń shatyryn julyp ketý sııaqty 11 jaǵdaı tirkelgen.
Aıtalyq: Beıbitshilik pen kelisim saraıy (jalpy kólemi 141 sharshy metr bolatyn syrtqy qabaty men keromagranıtten salynǵan 427 sharshy metr aýmaqtaǵy qasbeti men kireberis qaqpasyna zııan kelgen), №43 orta mektep (400 sharshy metr bolatyn shatyr julynǵan), «Araı» balabaqshasy (200 sharshy metrdi alyp jatqan shatyry julynyp, balalar alyńyna zaqym kelgen), «Dáýren» balabaqshasy (200 sharshy metr aýmaqta shatyry julynyp, balalar alańyna zaqym kelgen), Ulttyq mýzeı (100 sharshy metr aýmaqtaǵy shyny qabyrǵaǵa zaqym kelgen), «Olımp Palas-2» TK (10 sharshy metrdi alyp jatqan syrtqy qasbeti julynǵan, jańa salynyp jatqan bıznes-ortalyq (gaz blogynan qalanǵan 15-qabattyń 20 metr aýmaǵy qulaǵan), №24 mektep (600 sharshy metr bolatyn shatyr julyndy), №45 mektep (800 sharshy metr shatyr julynǵan), «Jaýqazyn» balabaqshasy (10 metr bolatyn balalar alańshasynyń shatyry julynǵan), «Nuraı» balabaqshasy (10 sharshy metr bolatyn balalar alańshasynyń shatyry julynǵan), sonymen qatar jańa salynyp jatqan eki nysanda (Esil aýdany, Túrkistan kóshesi 4 úı men Saryarqa aýdany Sulýkól kóshesi 14 úı) eki bıik kran qulady. Zardap shekkender men mert bolǵandar joq.
Halyqaralyq áýejaıda «Shymkent-Astana» baǵyty boıynsha ushyp kelip, jerge qonǵannan keıin júrip kele jatqan «Eır Astana» kompanııasynyń A-320 ushaǵy qaýipsizdik jolaǵyna ótip ketip, eki jaryq shamy men 2 bılbordty ilip ketken. Ushaqtyń bortynda 97 jolaýshy bolǵan. Sonyń saldarynan ushaqtyń sol jaq qozǵaltqyshynyń syrtqy qabaty zaqymdanǵan. Zardap shekkender men mert bolǵandar joq.
Saǵat 17.00-degi jaǵdaı boıynsha, «112» pýltine túrli zattardyń qulaǵany jáne kólikterdiń zaqymdanǵany týraly 875 qońyraý túsken.
Medıtsınalyq kómekke barlyǵy 10 adam júgingen. Olardyń 9-y alǵashqy medıtsınalyq kómek kórsetilgen soń úılerine jiberildi, 1 adam aýrýhanaǵa jatqyzyldy.
Aqmola oblysynda saǵat 14.30-da Tselınograd, Arshaly aýdandarynyń aýmaǵynda kúshti jel tirkeldi, jyldamdyǵy sekýndyna 25 metr jáne odan da joǵary boldy. Tselınograd aýdanynda atalǵan tabıǵattyń dúleı kúshi negizinen Aqmol, Qosshy, Qaratótkel aýyldyq okrýgterinde tirkelgen. Aqmol, Qosshy, Qaraótkel jáne Qarajar eldi mekenderine birshama qıyndyqtar týdyrdy.
Naqtyraq aıtqanda, atalmysh tórt aýylda kúshti jel saldarynan elektr jelileri úzilip, elektr taratý baǵandary qulady.
Saǵat 19.00-degi jaǵdaı boıynsha, elektr energııasy Aqmol aýylyna berilgen. Al Qosshy, Qarajar, Qaraótkel aýyldarynda (1300 abonent elektr jaryǵynsyz otyr) elektr jelilerin qalpyna keltirý boıynsha tıisti jumystar atqarylýda.
