Astana mańyndaǵy aýyldan 70 jyl buryn jazylǵan qundy kitap tabyldy
ASTANA. QazAqparat - Astana mańyndaǵy Aqmol aýylynan budan 70 jyl buryn jaryq kórgen qundy kitap tabyldy, dep habarlaıdy QazAqparat tilshisi.
Qaraótkel aýylynda soǵys ardageri Qorǵash Qylyshbaıulynyń balasy Ádilhan Qylyshbaevpen kezdesken «Qazaqstan tarıhy» portalynyń shyǵarýshy redaktory Zańǵar Kárimhan derek izdep Aqmol aýylyna barǵan. Ol aýyldaǵy B.Qylyshbaevtyń úıinen qyzyqty kitap tabylǵan.
«1949 jyly jaryq kórgen «Vybory v Verhovnyı Sovet Kazahskoı SSR 1947 g.» atty kitap «Kirispe», «Negizgi bólim», «Uly Otan soǵysy jyldaryndaǵy qazaqstandyqtar», «Qazaqstan ónerkásibi», «Qazaqstan aýylsharýashylyǵy», «Mádenıet pen turmysy», «Qazaqstan joǵary sovetiniń 1947 jylǵy saılaýy» degen birneshe bólimnen turady. Jalpy kólemi - 10 baspa tabaq, ıaǵnı 160 bet. «Qazogız» baspasynan shyǵarylǵan. Soǵystan keıingi kezeńniń tarıhı kartınasyn tolyq sıpattaıtyn basylymnyń mátini naqty, fotosýretteri jańasha», - deıdi ol.
Kitaptyń qundylyǵyn arttyryp turǵan tusy - tarıhı sátterdi qalt jibermeı túsirgen sýretterdiń kóptiginde. Otan soǵysy jyldarynda erligimen tanylǵan qazaq jáne qazaqstandyq batyrlardyń óshpes kelbeti men esimi búgingi tańda eskerýsiz qalǵan dala erjúrekteriniń tarıhı beınesi menmundalap turady. Altaı men Atyraýdyń, Qyzyljar men Tashkenttiń arasyndaǵy baıtaq dalanyń ortaq qazanyn qaınatqan, eginin toltyrǵan, qambasyn jasap, munaıyn tasytqan eńbek ardagerleriniń quryshtan jaralǵandaı bolmysy qapysyz ańǵarylady. Soǵystan keıingi turalaǵan ekonomıkany kóterýge serpin bergen irgeli óndiris oshaqtary men kásiporyndar jaıly statıstıkalyq derekter qory da az qamtylmaǵan. Óndiristegi ónimdilikti arttyrý úshin oılastyrylǵan stahanovshylar ádisiniń Qazaqstan dalasyna jappaı taralǵany, júzin kún súıip, mańdaıyn jel ópken dala eńbekkerleriniń eńbek maıdanyndaǵy tarıhı sátteri tańbaǵa basylǵan.
«Kitaptyń «Mádenıet pen turmys» atty bóliminde qazaq óneri men mádenıetiniń maıtalman tulǵalarynyń buryn esh jerde kezdespegen tarıhı sýretteri de oqyrman nazaryna usynylǵan. Ásirese, toqsan jasynda syrnaı tartyp otyrǵan halyq aqyny Shashýbaıdyń sýreti el tarıhy men ádebıeti úshin zor mańyzǵa ıe. Sondaı-aq Q. Sátbaevtyń, M. Áýezovtiń, S. Muqanovtyń, K. Ázirbaevtyń, Á. Tájibaevtyń, Jambyldyń, M. Ǵabdýllınniń, K. Baıseıitova men Sh. Jıenqulovanyń sýretteri qyzyqtyrary sózsiz», - deıdi Zańǵar Kárimhan.
