Astana mańyndaǵy aýdandarǵa qashan gaz tartylady
KÓKShETAÝ. QazAqparat - 2019 jyldan Aqmola oblysynyń Arshaly jáne Tselınograd aýdandarynyń 100 myń adam turatyn 20 eldi mekenine gaz tartý jumystary bastalady, dep habarlaıdy QazAqparat tilshisi oblystyń ishki saıasat basqarmasynyń óńirlik kommýnıkatsııalar qyzmetine silteme jasap.
Astana mańyndaǵy aýdandardy gazdandyrý Memleket basshysynyń tapsyrmasymen aýqymdy «Saryarqa» magıstraldy gaz qubyryn tartý jobasy aıasynda iske aspaq.
«Qyzylorda - Qaraǵandy - Astana» magıstraldy gaz qubyrynyń 1-ýchaskesiniń qurylysy aıasynda 2019 jyly «Arshaly» avtomatty gaz úlestirý stantsııasynan, sondaı-aq «Astana» 1-shi jáne 2-shi avtomatty gaz úlestirý stantsııalarynan, Arshaly, Tselınograd aýdandaryn gazdandyrý múmkindigi týyndaıdy.
«Ústimizdegi jyldyń mamyr aıynda oblystyq bıýdjetten «Qyzylorda - Astana» gaz qubyryna janasatyn eldi mekenderdiń joba-smetalyq qujattamalaryn iske asyrýǵa 100 mln teńge (bastapqy kezeń) bólindi. Sonyń ishinde Tselınograd aýdanyna 43,9 mln bólinip otyr. Eldi mekenderge gaz tartý eki kezeńmen júrgiziledi. Aldymen Kishi Tımofeevka, Qoıandy, Shubary aýyldary, al ekinshi kezeńde Aqmol, Qosshy, Qaraótkel, Prırechnoe aýyldary gazdandyrylady», - deıdi vedomstvodaǵylar.
Arshaly aýdany birinshi kezeńde Anar, Donetskoe, Túrgen, Bersýat, Baıdola, Arshaly, Aqbulaq, Aqtas, Ijevsk, Shóptikól, Babataı, Arnasaı, Volgodonovka, 42-razezd, Qoıgeldi, Jaltyrkól, Jibek joly aýyldaryn gazdandyrý úshin 56,1 mln teńgeni ıgeredi.
«Ekinshi kezeńde Tselınograd jáne Arshaly aýdandarynyń 151 myń turǵyny bar 44 eldi mekenin gazdandyrý josparlanyp otyr. Astana - Kókshetaý ýchaskesindegi gaz qubyrynyń ekinshi kezeńi 2022 jyly bastalady», - deıdi vedomstvo ókilderi.
