Astana mańyndaǵy áskerı bólimde lańkestikke qarsy operatsııa ótkizilýde (FOTO)
68665 áskerı bóliminde 2016 jylǵa arnalǵan QR QK Qurlyq áskerleriniń basqarý organdary, quramalary men bólimderiniń daıyndyq josparyna sáıkes áleýetti mınıstrlikter men vedomstvolardyń kúshteri men quraldaryn tarta otyryp, jergilikti jerdegi eki dárejeli komandalyq-shtabtyq oqý-jattyǵýy bastaldy.
Bul oqý-jattyǵýdyń ereksheligi - brıgada bólimsheleriniń lańkestikke qarsy operatsııalar tapsyrmalaryn oryndaý, arnaıy áskerı is-qımyldardy uıymdastyrýy bolmaq. Áskerıler is júzinde áskerı quralymdardyń basqarý organdarymen, aýmaqtyq áskerlermen jedel jáne taktıkalyq deńgeıde ózara is-qımyldy pysyqtaıdy.
Qaýiptiligi tómen qarýly janjaldarda Qarýly kúshterdi qoldanýdyń halyqaralyq tájirıbesi eskerile otyryp, arnaıy maqsattaǵy bólimshelerdi daıarlaý men jetildirýge erekshe kóńil aýdaryldy. Oqý-jattyǵýda áleýmettik-saıası jaǵdaı shıelenisken tus negizge alynǵan. Dúkenderdiń jappaı oırandalýy men ákimshilik ǵımarattar men kóliktiń órtenýine ulasýda. Bunyń bári lańkestikke qarsy operatsııanyń júrgizilýi men arnaıy áskerı is-qımyldardyń uıymdastyrylýyna sebepker bolýda. Ańyz boıynsha eldiń joly qıyn aýdandarynda atys qarýymen, qol granataatqyshtary, tasymaldanatyn mınaatqyshtarmen qarýlanǵan 100-150 adamnan quralǵan jaýyngerlik jasaqtar paıda bolǵan. Topttyń biri iri eldi mekenniń jeke ǵımaratynda ornalasqan. Oqý-jattyǵýǵa qatysýshylardyń mindeti - aýdandy qorshaýǵa alý, zańsyz qarýlanǵan quralymdy joıý.
Oqý-jattyǵýdy ótkizý kezinde lańkestikke qarsy operatsııany júrgizý úlgileri men tásilderin damytýdyń negizgi úrdisi eskeriletin bolady. Ol blok-beketterdegi bólimshelerdiń oqshaýlaý-buǵattaý is-qımyldary, mańyzdy memlekettik nysandardy kúzetý men qorǵaý jáne sodyrlardy joıý.
Oqý-jattyǵýǵa Qurlyq áskerleri bas qolbasshysy basqarmasynyń, 68665 áskerı bóliminiń, QR Memlekettik kúzet qyzmetiniń áskerı qyzmetshileri, Astana qalasynyń Tótenshe jaǵdaılar komıteti, QR Ulttyq ulany tartylady. Oqý-jattyǵýǵa barlyǵy 1000-nan asa jeke quram jáne 200-den astam birlik áskerı tehnıka qatysady. 
