Astana mańynda paıdaly qazbalardy zańsyz óndirgender anyqtaldy
ASTANA. QazAqparat - Astana qalasy Esil aýdandyq prokýratýrasynyń mobıldik toby men aýdandyq Іshki ister basqarmasy «Astany Ormany» memlekettik kommýnaldyq kásiporynnyń (Tassýat sýqoımasy) aýmaǵynda 13 arnaýly tehnıkany paıdalana otyryp, zańsyz keń taralǵan paıdaly qazbalardy óndirý faktisin anyqtady. Bul týraly Astana qalalyq prokýratýrasynyń baspasóz qyzmetinen habarlandy.
Oqıǵa ornyna tekserý júrgizý barysynda paıdaly qazbalardy óndirý óndirisi aýmaǵynyń tereńdigi 0.5-1 metr, kólemi shamamen 228 018 sharshy metr ekeni anyqtaldy. Osyǵan oraı, keń taralǵan paıdaly qazbalardy zańsyz óndirý faktisi Esil aýdandyq Іshki ister basqarmasyna tirkeldi. Qalalyq Ekologııa departamentiniń tergeýge deıingi tekserý sheńberinde júrgizilgen esebine sáıkes, zańsyz jumystan kelgen materıaldyq zalal 2 451 193 500 teńgeni quraıdy.
«Osyǵan baılanysty, Esil aýdandyq Іshki ister basqarmasy 18 qyrkúıekte zańsyz kásipkerlikpen aınalysý faktisi boıynsha qylmystyq is qozǵady. Qazirgi ýaqytta osy fakti boıynsha aýdandyq prokýratýra qajetti tergeý is-sharalaryn júrgizý, jan-jaqty jáne obektıvti zertteýdi qamtamasyz etýge baǵyttalǵan tıisti saraptama taǵaıyndaý týraly nusqaý berdi, onyń barysy turaqty baqylaýǵa alyndy», - delingen baspasóz habarlamasynda.
