Astana mańynda ótken qusbegiler saıysynda tarazdyq búrkitshiler top jardy (FOTO)
ASTANA. QazAqparat - Qarashanyń 13-15 aralyǵynda Astana qalasy Sofıevka tas jolynyń boıyndaǵy Qoıandy aýyly aýmaǵynda belgili búrkitshi Kúntýǵan Toqtybaıulyn eske alýǵa arnalǵan búrkitshilerdiń respýblıkalyq týrnıri jáne Astana qalasynyń ashyq birinshiligi ótti.
Atalmysh jarys halyq arasynda ulttyq sport túrlerin keńinen taratý, búrkitshiler arasynda tájirıbe almasý jáne sporttyq sheberligin arttyrý maqsatynda Qazaqstan Respýblıkasy mádenıet jáne Sport mınıstrligi sport jáne dene shynyqtyrý isteri komıteti, sondaı-aq Ulttyq sport túrleri qaýymdastyǵy, Astana qalasynyń dene tárbıesi jáne sport basqarmalarynyń muryndyq bolýymen uıymdastyryldy, dep habarlaıdy Ulttyq sport túrleri qaýymdastyǵynan.
Dodaǵa elimizdiń 9 oblysynan jáne Astana qalasynan 18 búrkitshi qatysty. Saıys búrkitti qolǵa shaqyrý, shyrǵa salý, ań qaqtyrý sııaqty 3 túri boıynsha ótti. Saıys qortyndysy boıynsha birinshi oryndy Taraz qusbegileri, ekinshi oryndy Astana búrkitshileri, úshinshi oryndy Pavlodardyń saıatshylary bólisti. Úzdik shyqqandar dıplomdarmen jáne medaldarmen marapattalyp, olarǵa QR Ulttyq sport túrleri qaýymdastyǵy tarapynan aqshalaı syılyqtar berildi.
