Astana mańynda ótetin alaman báıgeniń júlde qory 21 mln. teńgeni quraıdy
ASTANA. QazAqparat - QR Ulttyq sport túrleri qaýymdastyǵynda 14 qyrkúıek kúni alaman báıgeden ótetin týrnırdiń daıyndyq barysy talqylandy.
Uıymdastyrýshylar týrnırdegi qaýipsizdik sharalaryna basa nazar aýdaryp otyr. Sebebi, júzden júırikti anyqtaıtyn 43 shaqyrymdyq báıgede jylqyǵa da, sol qashyqtyqqa shydap beretin shabandozǵa da aýyr tıetini anyq.
Taǵy aıta ketetini, respýblıkalyq «Altyn tulpar» týrnıri Astanadan 30 shaqyrymǵa jýyq qashyqtyqta ornalasqan Qabanbaı batyr aýylynyń aýmaǵynda ótetin bolyp sheshildi. Báıge ulttyq sportynyń mamandaryna qala mańynan 43 shaqyrym jer bederiniń túrli jerinen ótetin jarys jolyn tańdaýǵa ońaı túsken joq. Sonymen qatar báıgeniń bekitilgen erejesi boıynsha, qatysýshy at úshin 95 000 (toqsan bes myń) teńge jarna tóleýi tıis. Al alaman báıgeniń júlde qory 21 mln. teńgeni qurap otyr. Bul qarjydan márege jetken alǵashqy toǵyzdyqqa syıaqy tabystalady. Naqtyraq aıtsaq, 1-shi orynǵa 10 mln., 2-shi orynǵa - 5 mln., 3-shi orynǵa - 2,5 mln., 4-shi orynǵa - 1,5 mln., 5-shi orynǵa - 1 mln., 6-shy orynǵa - 750 myń, 7-shi orynǵa - 500 myń, 8-shi orynǵa - 300 myń, 9-shy orynǵa - 150 myń teńge qarjylaı syıaqy beriledi, dep habarlaıdy QR Ulttyq sport túrleri qaýymdastyǵynan.
