Astana mańynda bir otbasynyń músheleri ystan ýlandy
ASTANA. QazAqparat - Astana mańynda úı jylytatyn peshtiń aqaýlyǵy saldarynan tutas otbasy ystan ýlandy, dep habarlaıdy QazAqparat tilshisi QR ІІM Tótenshe jaǵdaı komıtetine silteme jasap.
«2017 jyldyń 29 qarashasynda 9 saǵat 10 mınýtta Astana qalasy Esil aýdanynyń «Jańa Ilınka» turǵyn alabynda jylytý peshiniń jaramsyzdyǵynan 2 eresek adam men 3 bala ystan ýlanyp, orta deńgeıli aýyrlyqpen aýrýhanaǵa jatqyzyldy», - dep habarlady Tótenshe jaǵdaı komıtetiniń resmı ókili Rýslan Imanqulov.
Imanqulovtyń aıtýynsha, 2017 jyldyń bir ǵana qarasha aıynda turǵyn-úı sektorynda 31 ýly gazben ýlaný oqıǵasy tirkeldi, sonyń ishinde qatty otyn jaǵatyn peshtiń aqaýlyǵy saldarynan 26 oqıǵa, gaz ballonda redýktordyń jáne gaz kolonkasynyń aqaýlyǵy saldarynan 5 oqıǵa. Bul rette 43 adam (onyń ishinde 11 bala) ýly gazben ýlanyp, aýrýhanaǵa jatqyzylǵan, 10 adam oqıǵa ornynda kóz jumǵan.
«Aýa-raıynyń salqyndaýymen peshti durys paıdalanbaý saldarynan jazataıym oqıǵalar sany artyp, adam qazasy jıi oryn alady. Mundaı oqıǵalar aıazdy aýa raıy bastalysymen, suıyq jáne qatty otynmen pesh jaǵý kóbeıgende jáne halyqtyń qarapaıym qaýipsizdik erejelerin umytýynan bolady», - deıdi Imanqulov.
Komıtet keltirgen deerkterge sáıkes, ýly gazben ýlaný oqıǵalary Shyǵys Qazaqstan - 4, Soltústik Qazaqstan - 4, Jambyl - 4, Almaty - 4, Pavlodar oblystarynda - 2, Astana q. - 2 tirkeldi. Qyzylorda, Aqmola, Qostanaı, Batys Qazaqstan, Aqtóbe, Qaraǵandy oblystarynda jıi oryn alǵan.
