Astana mańynan 222 myń gektar paıdalanylmaı jatqan jer anyqtaldy - Óńirlik damý mınıstrligi
ASTANA. 5 jeltoqsan. QazAqparat - Astana qala mańy aýmaǵynda 222 myń gektar jer paıdalanylmaı jatyr.
Eske salaıyq, Astana qala mańy aýmaǵyna úsh aýdan kiredi, olar: Arshaly, Tselınograd jáne Shortandy aýdandary. Bul týraly búgin Óńirlik damý mınıstrliginde Astana qalasy men onyń mańyndaǵy jerlerdi paıdalaný máselesi boıynsha Memleket basshysynyń tapsyrmalaryn oryndaýǵa arnalǵan keńeste málim boldy.
«Astana qala mańy aýmaǵyndaǵy jerdi túgendeý nátıjesinde jalpy kólemi 222 myń gektardy quraıtyn 5 myń 522 jer ýchaskesiniń paıdalanylmaı jatqany belgili boldy. Olardyń arasynan 98 myń gektardy quraıtyn 599 jer ýchaskesi memlekettik menshikke qaıtaryldy», dedi jıyn barysynda Jer resýrstaryn basqarý komıtetiniń tóraǵasy Baýyrjan Smaǵulov. Onyń aıtýnysha, túgendeý nátıjesinde jalpy aýmaǵy 48 myń gektardy quraıtyn 3689 jer ýchaskesi ıesiz retinde esepke alynǵan. Esepke alynǵan osy jer ýchaskeleri 1 jyl ótkennen soń memelket menshigine ótetin bolady. Budan bólek, 14 myń gektardy quraıtyn 140 jer ýchaskesi boıynsha azamattyq-quqyqtyq mámileler jasalǵan.
«23 myń gektar boıynsha 105 jer ýchaskesiniń ıeleri men jerdi paıdalanýshylarǵa jazbasha eskertý hattar joldandy. Endigi kúni olar jer telimderin ıgermeıtin bolsa, onda bul ýchaskeler de memleket menshigine qaıtarylady. 23 myń gektardy quraıtyn 101 jer ýchaskesine aryz-shaǵymdarmen jumys atqarylyp jatyr. Al aldaǵy 2014 jyly 14 myń gektardy quraıtyn 585 jer ýchaskesine qaıta tekserýler júrgiziledi», - deıdi B. Smaǵulov.
