Astana mańynan 15 myń jer telimin bólýge 1 mlrd. AQSh dollaryna jýyq qarjy qajet
ASTANA. 27 jeltoqsan. QazAqparat - Astanada 10 sotyq jerge ıe bolýǵa nıetti adamnyń sany 100 myńnan asyp otyr. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda Astana qalasynyń ákimi Imanǵalı Tasmaǵambetov málim etti.
«Birinshiden, qaladan 30 shaqyrymdyq qashyqtyqta jeke úı salýǵa jer berýge tyıym salý týraly Elbasynyń tapsyrmasy bar. Óıtkeni, qalaǵa jaqyn jerlerge úı salynyp, aýyldar paıda bolyp jatyr. Biraq bul aýyldarda ne jol joq, ne elektr qýatymen qamtamasyz etilmegen. Eń bastysy, bul jerlerde jumys orny joq. Sondyqtan barlyǵy qalaǵa kelip jumys istep, jaǵdaıyn osynda sheshedi. Olaı bolatyn bolsa, árıne, mundaı turmys qolaıly bolmaıdy»,-dep toqtaldy ákim.
Onyń sózine qaraǵanda, Astanada 10 sotyq jerge ıe bolýǵa nıetti adamnyń sany 100 myńnan asyp otyr.
«Bundaı jaǵdaı qalada joq. Sebebi, Bas josparymyz boıynsha 2025-2030 jylǵa deıin berýge múmkindik bar jerdiń kólemi 10 sotyqtan esepteıtin bolsaq, tek 15 myń adamǵa arnalǵan. Bul 15 myń ýchaskeni halyqqa qazir bólip berýge bolady. Biraq ta, bul jer telimderinde jol joq, qubyrlar tartylmaǵan»,-dedi I. Tasmaǵambetov.
Osy oraıda ol azamattar úı salyp alǵannan soń qajetti ınfraqurylym bolmaǵannan keıin qıyndyqqa tap bolatynyn sóz etti. Atalǵan 15 myń jer telimin ınfraqurylymmen qamtamasyz etý úshin 150 mıllıard teńge qajet.
«Bul qarjyny bir sátte bóle salýǵa múmkindik joq. Sondyqtan bul birte-birte sheshilip kele jatqan másele»,-dep túıdi ákim.
