Astana mańyna bıyl 120 myńǵa jýyq aǵash jáne buta egiledi
NUR-SULTAN. QazAqparat – Elorda mańyna bıyl 120 myńǵa jýyq buta-aǵash egiledi. Bul týraly búgin óziniń Instagram paraqshasynda Nur-Sultan ákimi Altaı Kólginov jazdy, dep habarlaıdy QazAqparat.
«Elordany «Nur-Sultan-jaı̆ly qala» sheber - josparynyń tujyrymdamasy aıasynda damytyp jatyrmyz. Bıyl jasyl aı̆maqtar aı̆tarlyqtaı̆ ulǵaıady. Ekologııany jaqsartý men qala turǵyndarynyń ýaqyt ótkizýine qolaı̆ly oryn qurý úshin Nur-Sultandy kógaldandyramyz.
Budan basqa, aýlalar men qoǵamdyq oryndarda (saıabaqtar, skverler, býlvarlar) aǵash otyrǵyzýdy jalǵastyramyz. Sonymen birge «Qazaq eli» alańy, Beı̆bitshilik jáne kelisim saraı̆y, Oqýshylar saraı̆y, vokzal, áýejaı̆, SOO, turaq keńistigi jáne t. b. aýmaqtarda aǵash otyrǵyzýdy josparlap otyrmyz.
Memleket basshysynyń tapsyrmasyna sáı̆kes, qalany kógaldandyrýǵa erekshe kóńil bólemiz. Jalpy bıyl 120 myńǵa jýyq jasyl jelek (aǵashtar, butalar) otyrǵyzýdy josparlap otyrmyz. Elordanyń jasyl beldeýinde 450 myńnan astam kóshet bar.
Pandemııa bizge densaýlyqty saqtaý jáne sportpen shuǵyldaný qanshalyqty mańyzdy ekenin kórsetti. Medıtsına qyzmetkerleri, muǵalimder, qutqarýshylar jáne basqalar koronavırýspen kúreste aldyńǵy qatarda boldy. Pedagogtar, dárigerler men qutqarýshylardyń qurmetine taqyryptyq gúlzarlar men parkter ashyp, olardy abattandyrýdy josparlap otyrmyz»,-dep jazdy shahar basshysy.
Sonymen qatar onyń aıtýynsha, «Astana Balet» mańyndaǵy aýmaqta jasyl baq, «Astana Opera» aýmaǵynda emen baǵy, al Trıatlon parkte sıren baǵy salynbaq. Qala túrlene túsedi.
«Elordanyń ár aýdanyn kógaldandyramyz. Elbasy suhbatynda elordanyń bas jospary ǵımarattardyń, jasyl jelekter men ormannyń sımbıozy retinde jasalǵanyn atap ótti. Bul taqyrypty jalǵastyramyz, qala turǵyndarynyń qatysýymen senbilikter, ekoaktsııalar ótkizemiz. Qalany kógaldandyrýǵa árkim óz úlesin qosa alady. Qurmetti qala turǵyndary men qonaqtary! Sizder qaı̆ jerde kóbirek jasyl jelekti kórgilerińiz keledi, qalanyń qandaı̆ aýdandary men oryndaryn kógaldandyrý qajet?», - deıdi Altaı Kólginov.
