Astana mańynda jeńil motorly ushaq apatqa ushyrap, eki adam mert boldy

ASTANA. KAZINFORM – Astanaǵa jaqyn Jolaman áýeaılaǵy mańynda jeńil motorly ushaq apatqa ushyrap, eki adam mert boldy. Bul týraly Kólik mınıstrligi málim etti.

—Búgin shamamen saǵat 11.30-da Jolaman áýeaılaǵy mańynda (Astana qalasy) oqý-jattyǵý ushýyn oryndaý barysynda TL-2000 jeńil motorly ushaǵy apatqa ushyrady. Bul ushaq jeke tulǵaǵa tıesili. Aldyn-ala málimetke sáıkes bortta eki ekıpaj múshesi boldy. Ekıpaj músheleri qaza tapty, — delingen habarlamada.

Oqıǵany tergep-tekserý úshin qoldanystaǵy erejege sáıkes avıatsııalyq oqıǵalar men ıntsıdentter jónindegi arnaıy komıssııa qurylady.

Kólik mınıstrligine qarasty kóliktegi oqıǵalar men ıntsıdentterdi tergeý departamenti qyzmetkerleri avıatsııalyq oqıǵaǵa ornyna barady.

Buǵan deıin San-Dıegoda ushaq apatynan adamdar qaza tapqanyn jazǵan edi.