Astana mádenıet jáne óner qyzmetkerlerin quttyqtaıdy
ASTANA. 27 qyrkúıek. QazAqparat - 28 qyrkúıekte saǵat 12.00-de Kongress- holda mádenıet jáne óner qyzmetkerleriniń kásibı merekesi qarsańynda kontsert ótedi. Bul kúni mádenıet qyzmetkerleri Astana ákiminiń atynan alǵys hattarmen marapattalady, dep habarlaıdy elordanyń resmı saıtynan.
Qazaqstanda atalmysh mereke Memleket basshysynyń jarlyǵymen ótken jyldan bastap qyrkúıek aıynyń sońǵy jeksenbisinde atap ótiledi. Bul - búkil sala qyzmetkerleri úshin mańyzdy shara.
Sońǵy jyldary Astanada ótkizilgen jahandyq máseleler talqylanyp, mańyzdy sheshimder qabyldanyp júrgen halyqaralyq is-sharalar elordanyń beıbitshilik jáne kelisim ortalyǵy ekeniniń dáleli bolyp tabylady. Astana da elimizdiń mádenı ordasy jáne mádenıet almasýlardy basqaratyn kommýnıkatsııalyq ortalyq atanýǵa laıyq. Jyl saıyn qalada 8 myńnan astam mádenı is-shara ótkiziledi. Ony 2,5 mıllıonnan astam kórermen tamashalaıdy. Qazaqstannyń astanasynda respýblıkalyq jáne halyqaralyq mańyzdaǵy kezdesýler men forýmdar jıi ótkiziledi, onda mádenı is-sharalar da uıymdastyrylady.
Óner qaıratkerleriniń shyǵarmashylyq qabiletterin ashýǵa, daryndy jastardy sheberlikterin jańa kásibı deńgeıge arttyrýǵa yntalandyrý úshin zamanaýı óner nysandary salynyp jatyr, olara jumys isteýge barlyq qajetti jaǵdaılar jasalǵan. Mysaly, Táýelsizdik saraıy, Beıbitshilik jáne Kelisim saraıy, «Qazaqstan» ortalyq kontsert zaly, «Shabyt» shyǵarmashylyq saraıy jáne «Astana Opera» memlekettik opera jáne balet teatry syndy biregeı jobalar qazirgi zamanǵy talaptarǵa sáıkes keledi.
Ónerdiń damytýǵa halyq moıyndaǵan jańa festıvalder men baıqaýlar da yqpal etedi. Atap aıtqanda, halyqaralyq «Shabyt» shyǵarmashyl jastar festıvali, «Azııa jańǵyryǵy» tsırk óneriniń, jastar bıiniń, ekshn-fılmderdiń halyqaralyq festıvalderi men D. Matsýevtyń jetekshiligimen ótetin pıanısterdiń klassıkalyq mýzyka festıvali. Osynyń barlyǵy tanymal jáne shyǵarmashylyqqa endi ǵana aıaq basqan jas daryndar qatysatyn bedeldi mádenı jobalar.
Eki jyl buryn elordalyq eki teatr «akademııalyq» qurmetti ataǵyna ıe boldy. Olar taıaý jáne qıyr shetelderdegi keńinen tanymal teatrlandyrylǵan festıval jobalaryna belsendi qatysady, ózderiniń sheberlikterin kórsetip, júldeli oryndar alyp júr. QR halyq ártisi Tilektes Meıramov, Gúljan Áspetova, QR eńbek sińirgen qaıratkerleri Láılá Beknazar, Natalıa Kosenko, mádenıet qaıratkeri Chehonadtskıı Roman Borısovıch. Rejısserler: Nurǵanat Jaqypbaev, Álimbek Orazbek, Bolat Uzaqov, Nurlan Jumanııazov, Parmanov Bekbolat syndy qalamyzdaǵy teatrlardyń zor maqtanyshy bolyp tabylady.
Astana qalasynyń memlekettik fılarmonııasynda da elimizdiń belgili qaıratkerleri, QR halyq ártisteri Aıman Musaqojaeva, Qaırat Baıbosynov, Nurjamal Úsenbaeva qyzmet etedi.
Budan basqa, onda «Qazaqstannyń eńbek sińirgen ártisi», «Qazaqstannyń eńbek sińirgen qaıratkeri» «Mádenıet qaıratkeri» ataǵyna ıe bolǵan tulǵalar, «Daryn» memlekettik jastar syılyǵynyń, «Eren eńbegi úshin» úkimettik nagradanyń ıegerleri, halyqaralyq jáne respýblıkalyq konkýrstardyń laýreattary jumys isteıdi.
Qalanyń mádenıet jáne óner qaıratkerleri ózderiniń myqtylyǵyn talaı ret dáleldegen. Keń aýqymdy teatrlandyrylǵan qoıylymdar, halyqaralyq jáne respýblıkalyq festıvaldar, konkýrstar, úzdik shyǵarmashylyq kúshterdiń qatysýymen ótetin kórmeler qalanyń ár turǵynynyń jadynda máńgi saqtalatyn oqıǵalarǵa aınaldy.
