Astana LRT burynǵy basshysy Talǵat Ardanǵa qatysty qylmystyq is tergelip jatyr — Antıkor
ASTANA. KAZINFORM – Antıkor «Astana LRT» JShS-nyń burynǵy basqarma tóraǵasyn jaýap alýǵa shaqyrady. Bul týraly agenttiktiń baspasóz qyzmeti málimdedi.
Qazaqstan Respýblıkasynyń Sybaılas jemqorlyqqa qarsy is-qımyl agenttigi «Astana LRT» JShS-nyń burynǵy basqarma tóraǵasy Talǵat Ardanǵa qatysty qylmystyq isti tergep jatyr.
«Tergeý barysynda aýyr qylmys jasady dep kúdikke ilingen T. Ardanǵa qatysty jınalǵan dálelder onyń áreketterin QR Qylmystyq Kodeksiniń 361-baby 4-bóligi 3-tarmaǵy boıynsha saralaýǵa múmkindik berdi», — delingen habarlamada.
Málim bolǵandaı, QR Qylmystyq-protsestik kodeksiniń 208-baby 1-bóligine sáıkes kúdikti jaýap alýǵa shaqyrylyp otyr.
«Alaıda, kúdikti T. Ardan Qazaqstan Respýblıkasynan tys jerde bolýyna jáne kelýden jaltarýyna baılanysty Sybaılas jemqorlyqqa qarsy qyzmet QR QPK-niń 205-babynyń 3-bóligin basshylyqqa ala otyryp, kúdiktini shaqyrý týraly habarlamany buqaralyq aqparat quraldarynda jarııalaıdy», — dep habarlady agenttik.
Jaýap alý jáne kúdiktiniń is-áreketin saralaý týraly qaýlyny jarııalaý úshin T. Ardan 2024 jyly 23 tamyzda saǵat 09:00–de Qazaqstan Respýblıkasy, Astana qalasy, Qabanbaı batyr dańǵyly, 19, «B» blogy mekenjaıynda ornalasqan Qazaqstan Respýblıkasy Sybaılas jemqorlyqqa qarsy is-qımyl agenttiginiń ákimshilik ǵımaratyna jedel-tergeý tobynyń basshysy J. Ótepqalıevke kelý qajet.
Kúdikti tergeý áreketterine qatysý úshin qorǵaýshyny derbes shaqyrýǵa ne qylmystyq protsesti júrgizýshi organnyń qorǵaýshynyń qatysýyn qamtamasyz etý týraly ótinishhat berýge quqyly (QR QPK 68-baby).
Eger qorǵaýshyny kúdikti nemese onyń zańdy ókilderi, sondaı-aq olardyń tapsyrmalary boıynsha basqa adamdar shaqyrmasa, qorǵaýshynyń qatysýyn qylmystyq protsesti júrgizetin organ qamtamasyz etedi (QR QPK 67-baby).
