«Astana LRT» jol apaty týraly: Avtobýs júrgizýshisi mas bolmaǵan
NUR-SULTAN. QazAqparat - «Astana LRT» kompanııasy búgingi jol apatynda mert bolǵan №301 avtobýstyń júrgizýshisi týraly aıtyp berdi, dep habarlaıdy QazAqparat.
«Naqty málimetterge sáıkes, 1966 jyly týǵan avtobýs júrgizýshisi apat kezinde uıaly telefon qoldanbaǵan jáne alkogoldi mas kúıinde bolmaǵan. Reıs aldynda júrgizýshi medıtsınalyq tekserýden ótken, densaýlyǵy qanaǵattanarlyq (arterıaldyq qan qysymy 110/70) bolǵandyqtan kólik quralyn basqarýǵa jiberilgen», - dep jazdy Astana LRT baspasóz hatshysy Naýat Azanbaeva Facebook jelisinde.
Onyń aıtýynsha, avtobýstyń da esh aqaýy bolmaǵan jáne ol barlyq tehnıkalyq talaptarǵa sáıkes kelgen.
«Qazirgi ýaqytta jol-kólik apatynyń sebepteri egjeı-tegjeıli anyqtalyp jatyr. Oqıǵa týraly shyndyqqa janaspaıtyn aqparatty taratpaýlaryńyzdy suraımyz», - dedi N. Azanbaeva.
Eske sala ketsek, 26 naýryz kúni Uly Dala men Qabanbaı batyr dańǵyly qıylysynda úsh avtobýs pen jeńil kóliktiń qatysýymen jol apaty boldy. Qalamańy baǵdaryndaǵy №301 avtobýs júıitkigen kúıi baǵdarshamǵa toqtap turǵan №12 jolaýshylar avtobýsyn soqty. №12 marshrýt ekpinmen óz aldyndaǵy № 53 avtobýsqa jáne jedel járdem kóligine soǵyldy.
Astana LRT ókiliniń habarlaýynsha, №301 avtobýs júrgizýshisi Abaı Ospanov tańǵy 6.30-da reıske shyǵarda medıtsınalyq tekserýden ótken jáne densaýlyǵynan esh kinárat baıqalmaǵan.
Tıisti medıtsınalyq saraptamadan keıin jol apatynan zardap shekkenderge ótemaqy tólenedi.
Sońǵy aqparat boıynsha, oqıǵadan zardap shekkender sany 36-ǵa jetti.
