Astana LRT jobasynyń keleshegi ne bolady

NUR-SULTAN. QazAqparat – Qazaqstanda respýblıkalyq bıýdjet shyǵystarynyń ońtaılandyrylyp jatqany belgili. Osy jumys sheńberinde elordadaǵy Astana LRT jeńil relsti kólik jobasynyń keleshegi ne bolady? Bul suraq búgin Úkimettiń baspasóz ortalyǵynda Ulttyq ekonomıka mınıstri Rýslan Dálenov pen QR birinshi qarjy vıtse-mınıstri Berik Sholpanqulovqa qoıyldy, dep habarlaıdy QazAqparat tilshisi.

«Qazirgi ýaqytta Esep komıtetiniń Astana LRT jobasyna qatysty keńesi Úkimetke kelip tústi. Qazir qaraýda jatyr. Aldaǵy ýaqytta dáleldemeler men keńester keńinen talqylanady. Osydan keıin jobany jalǵastyrý nemese jalǵastyrmaý jaǵyna qatysty sheshim qabyldanady», - dedi QR birinshi qarjy vıtse-mınıstri Berik Sholpanqulov.

Áriptesiniń jaýabynyń izin ala sóz sóılegen Ulttyq ekonomıka mınıstri Rýslan Dálenov te jobaǵa qatysty naqty sheshim qabyldanbaǵanyn rastady.

«Astana LRT – jergilikti bıýdjettiń, ıaǵnı qalanyń jobasy. Sol úshin bul rette qalamen (ákimdigimen) keńesken abzal. Qazir naqty sheshim qabyldanǵaly otyr. Sebebi bul jobany júzege asyrýdyń artyqshylyqtary men kemshilikteri de bar. Bári ólshenip, qazirgi jaǵdaıǵa baılanysty sheshim qabyldanady», - dedi ol.

Eske salsaq, Prezıdent byltyr kúzde LRT qurylysyn jedeldetýdi jáne oǵan qatysty isti tergeýdi tapsyrǵan bolatyn.

Artynsha osy jyldyń qańtar aıynyń sońynda Sybaılas jemqorlyqqa qarsy is-qımyl agentiginiń ekinshi departamentiniń basshysy Sergeı Perov elordada LRT qurylysyn salý barysynda qarajat urlaý qylmystyq isin tergeý sharalary aıaqtalǵanyn málim etken edi. Onyń aıtýynsha, anyqtalǵan shyǵyn somasy 5,7 mlrd teńgeni qurap otyr. Atalǵan is boıynsha 10-nan astam adamnyń jaýapkershiligi tekserilip, úsh adamǵa izdeý jarııalanǵan.