«Astana LRT» jer ústi metrosynyń baǵasy týraly aıtty
ASTANA. QazAqparat - Elordadaǵy jer ústi metrosynda jol júrý quny 1000 teńge bolady degen aqparat shyndyqqa saı kelmeıdi. Bul týraly «Astana LRT» JShS habarlady .
«Búgin birqatar BAQ pen áleýmettik jelilerde elordada turǵyzylyp jatqan jeńil relsti kólikpen jol júrý aqysy týraly habarlama taraǵan bolatyn. Atalǵan habarlamalar boıynsha sarapshylar jol júrý aqysyn eseptep shyǵarǵan. Alaıda keltirilgen málimetter shyndyqqa saı kelmeıdi. Qazirgi ýaqytta joba áli qurylys satysynda. Sondyqtan, elorda úshin jańa kóliktiń jol júrý aqysyn tap basyp aıtý orynsyz», - delingen kompanııanyń saıtynda.
Habarlanyp otyrǵandaı, qarjylyq-ekonomıkalyq negizdemeni ázirleý kezinde jol júrý aldyn ala baǵasy 200 teńge bolyp eseptelgen.
«Biz ýaqyt talabyna jáne álemdik standarttarǵa saı keletin kóliktik júıeni iske qosýǵa tyrysamyz. Sondyqtan, aldaǵy on jylǵa kóz sala bilýimiz kerek. LRT jelisi - keleshekte qalanyń ósip kele jatqan qajettiligin qanaǵattandyrý baǵytyndaǵy qoǵamdyq kólikterdi damytýda jasalǵan taǵy bir qadam», - dep habarlaıdy kompanııadan.
Eske sala ketsek, osy jyldyń jazynda Astana qalasynyń ákimi bolyp turǵan kezinde Áset Isekeshev elordadaǵy jeńil relsti tramvaıdyń jaıy týraly aıtyp bergen bolatyn. Shahar basshysy sol kezde jeńil relsti tramvaıdyń baǵytyn qaı jaqta uzartý kerektigi týraly másele talqylanyp jatqanyn atap ótken. Bir nusqa boıynsha, jelini Qabanbaı batyr dańǵyly boıynsha tike tartyp, odan ary Turan arqyly «Saryarqa» saýda ortalyǵy, «Kerýen-sıtı» jaqqa jeli jalǵasýy múmkin. Taǵy bir nusqa negizinde jeńil relsti tramvaı qalalyq saıabaq arqyly oń jaǵalaýǵa túsip ketýi yqtımal. Sonymen birge, LRT qurylysyn jańa temir jol vokzalynan bastap, Abylaı han dańǵyly arqyly eski vokzalǵa tartý jospary da bar.
