«Astana LRT» jeńildik kartalaryn berý protsedýrasyn ońaılatady
ASTANA. QazAqparat - «Astana LRT» JShS qoǵamdyq kólikte jol júrý kartalaryn alý úshin jeńildigi bar azamattardyń kezegimen qalaı kúresetindikterin aıtyp berdi, dep habarlaıdy QazAqparat.
«Atalǵan kratalardy endi ǵana almaq bolǵan zeınetkerler týraly málimetter bazaǵa tek 3 aıdan keıin ǵana túsedi. 3 aı barynsha uzaq merzim. Taıaý aralyqta baza aptasyna bir ret jańartylyp turatyn bolady. Biz jeńildigi barlarǵa kólik kartasyn Memlekettik zeınetaqy tóleý ortalyǵyna zeınetaqy kitapshasyn alǵan kezde birden berý múmkindigin qarastyrýdamyz. Sonda atalǵan kartany alý barysynda jeńildikke ıe azamattardyń uzyn-sonar kezegine qatysty másele sheshiledi», - dedi «Astana LRT» JShS qoǵammen baılanys departamentiniń jetekshisi Naýat Azanbaeva.
Onyń aıtýynsha, qoǵamdyq kólikte jol júrýge arnalǵan kartasy bar jeńildikke ıe azamattardyń basym bóligi kartalaryn valıdatordan ótkizgisi kelmeıdi. Al ol aldaǵy jyldary bıýdjetti qalyptastyrý úshin óte mańyzdy.
«Ataýly kólik kartasyn da mindetti túrde valıdator arqyly ótkizý qajet. Jeńildikke ıe azamattar kartalaryn kórsetedi de ony valıdatordan ótkizbeıdi. Sol arqyly saparlaryn tirkemeıdi. Múmkin valıdatorǵa jetý qıyndaý bolar. Biraq, avtobýstan túsip bara jatqan kezde valıdatorǵa tirkelý qajet. Osyndaı jaıttarǵa birneshe márte kýá boldym jáne barlyq ýaqytta atalǵan protsedýranyń mańyzdylyǵyn túsindiremin», dedi ol.
N. Azanbaevanyń sózine qaraǵanda, jergilikti bıýdjet tasymaldaýshy shyǵyndarynyń bir bóligin óteıdi.
«Jalpy Astanada 114 myń jeńildikke ıe azamat tirkelip, 76 myń karta berildi. Solardyń tek 51 myńy ǵana kartalaryn valıdatordan ótkizedi. Biz kondýktorlarǵa jeńildik kartasyn mindetti túrde valıdatorlan ótkizýdi tapsyrdyq», - dedi ol.
