«Astana LRT» jańa kólik baqylaý qyzmetkerleriniń formasyn tanystyrdy (FOTO)
ASTANA. QazAqparat - «Astana LRT» JShS elordada iske qosylatyn jańa kólik baqylaý qyzmetiniń qyzmetkerleri kıetin formany tanystyrdy.
«QazAqparat» tilshisiniń saýalyna jaýap bere otyryp, kompanııanyń baspasóz hatshysy Aıgúl Jamalova jańa baqylaý qyzmeti eki topqa bólinip jumys isteıtinin aıtty.
«Birinshi top - qoǵamdyq kólikterde oryn alǵan tártip buzýshylyqtardy anyqtap, baqylaýynda ustaıtyn jelidegi qyzmetkerler. Ekinshi top - osy tártip buzýshylyqtardy tirkep, quzyrly organdarǵa jetkizetin zańgerler», - deıdi baspasóz hatshy.
A.Jamalova atap ótkendeı, bul baqylaý qyzmetin polıtsııa qyzmetkerlerimen, bolmasa, quqyq qorǵaýshylarmen shatastyrýǵa bolmaıdy.
«Bizdiń mindetimiz - polıtsııanyń jumysyn qaıtalaý emes, kerisinshe, kómek berý, tıisti organdarmen ózara baılanys ornatyp, aıyppuldardy retteý. Sondyqtan, jańa baqylaý qyzmetin qurý - ákimshilik polıtsııa basqarmasymen aqyldasqan másele. Bul jobalardyń barlyǵy Astanadaǵy kólik keshenin jańǵyrtýdyń keshendi jospary aıasynda júzege asyrylýda»,-dep túsindirdi A.Jamalova.
Jańa kólik baqylaý qyzmeti qoǵamdyq kólikterdegi zań buzýshylyqtardy, ıaǵnı, tipti, qoǵamdyq kólikte bılet bermeıtin kondýktorlardyń áreketin baqylap otyrady.
«Kólik baqylaý qyzmeti jolaýshylardy ǵana emes, kondýktorlar men kólik júrgizýshilerin de tekserip otyrady. Sebebi, qazir kólik júrgizip kele jatyp, temeki tartatyn, bolmasa, uıaly telefonmen sóılesetin júrgizýshiler kezdesip jatady. Tipti, dórekilik tanytqan kondýktorlar men kólik júrgizýshilerine de aıyppul salý, bolmasa, eskertý aıtý máselesin osy jańa qyzmet óz quzyryna alady», - dep tolyqtyrdy A.Jamalova.
