«Astana LRT» zańbuzýshylyqtardy elorda turǵyndarymen birge anyqtamaq
ASTANA. QazAqparat - Elordadaǵy qoǵamdyq kólikterge jaýapty «Astana LRT» JShS 2018 jyldyń 4 qazanynan bastap 3 qarashasyna deıin «Qoǵamdyq baqylaý: aıaldamaǵa toqtaý» aılyǵy ótetinin jarııa etti, dep habarlaıdy QazAqparat tilshisi.
«Qurmetti qoǵamdyq kólik paıdalanýshylary! Qala ómirine beı-jaı qaramaıtyn elordalyqtar! Qoǵamdyq kólik salasy úkimet tarapynan sýbsıdııalanatyny kópshiligińizge málim. Tasymaldaýshylar kórsetetin qyzmet sapasy sýbsıdııaǵa laıyqty bolýy kerek. Sonymen qatar, biz jolaýshylardan kún saıyn avtobýstyń aıaldamaǵa durys toqtamaýy, avtobýsty júrgizýshiniń kilt tejeýi, aıaldamaǵa toqtamaı ótip ketýi, jolaýshylardy mingizý-túsirý kezinde qaýipsizdik erejelerin saqtamaýy jáne t.b. sııaqty sebeptermen júrgizýshilerdiń tarapyna aıtylatyn kóptegen shaǵymdardy qabyldaımyz», - delingen kompanııanyń Feısbýk paraqshasynda.
Osyǵan baılanysty kompanııa azamattardy mańyzdy is-sharaǵa belsene qatysýǵa shaqyrdy. Eger jolaýshylar qoǵamdyq kóliktiń qolaıly bolǵanyn qalasa, sondaı-aq belsendi azamattyq pozıtsııany ustansa, 4 qazannan bastap 3 qarashaǵa deıin «Qoǵamdyq baqylaý: aıaldamaǵa toqtaý» aılyǵyna atsalysýy kerek.
«Aılyqqa kemshilikke kýá bolǵan kez kelgen jolaýshy qatysa alady. Ol úshin qoǵamdyq kólikke qatysty tártip buzý faktisin foto nemese beınejazbaǵa túsirip, naqty ýaqyty men ornyn kórsetip, bizge jiberýi kerek. Habarlamany ózińizdiń Facebook, Instagram paraqshańyzda #kontrolALRT, #mesıachnıkALRT, #baqylaýaılyǵy, #ALRTbaqylaý heshtegterimen qaldyrýyńyzǵa bolady. Sonymen birge, joǵaryda kórsetilgen heshtegtermen «Astana LRT» seriktestiginiń resmı paraqshalaryna jeke habarlamamen jiberýge nemese press@astanalrt.com poshtasyna «Obşestvennyı kontrol» nemese «Qoǵamdyq baqylaý» belgisimen joldaýǵa múmkindik bar» delingen habarlamada.
Aıan Bekenuly
