Astana LRT qyzmetkerleri «Biz birgemiz» aktsııasyna qatysty

NUR-SULTAN. QazAqparat - «Astana LRT» kompanııasynyń qyzmetkerleri «Asyl bóbek» jáne «Móldir» balabaqshasynyń, sondaı-aq Ortalyq kassanyń aýmaǵyn qardan tazalaýǵa shyqty, dep habarlaıdy QazAqparat qala ákimdiginiń saıtyna silteme jasap.

«Bul oryndar kezdeısoq tańdalǵan joq. Mysaly, «Asyl bóbek» balabaqshasyna erekshe qajettiligi bar balalar barady, olardyń ishinde múgedek arbasynda otyratyn balalar da bar. Qatty borannan keıin, balabaqsha aýmaǵyn qar basyp, ata-analar úshin balany kóterip podezge jetý qıyndady», delingen habarlamada.

Boran kezinde qalyń túsken qardy tazalaý kóp ýaqyt alatyn edi, óıtkeni mekemede qyzmetker kóp emes, al ata-analar men balalar úshin taza jol qazir jáne tez arada qajet.

Ortalyq kassada da osyndaı jaǵdaı. Kassaǵa kelýshilerdiń ishinde zeınetkerler, múgedekter jáne kópbalaly analar bar. Birlesken kúsh-jigermen birneshe saǵat boıy atalǵan mekemeler aýmaǵy tazartyldy.
Aıta keteıik, elorda jastary áleýmettik jelide qar kúreý chellendjin bastady. Elorda eriktilerin Memleket basshysy Qasym-Jomart Toqaev ta qoldady.