Astana LRT qyzmetkeri eki ret tólem alynbaıtynyn óz kartasymen dáleldedi
ASTANA. QazAqparat - «Astana LRT» JShS tólem júıesi departamenti dırektory Dáýren Nurálıev Astanadaǵy qoǵamdyq kólik kartalarynan eki ret tólem alynbaıtynyn aıtyp, sózi dáleldi bolý úshin tólem qabyldaıtyn valıdatorǵa kartochkasyn basyp kórsetti, dep habarlaıdy QazAqparat tilshisi.
«Eki ret tólemniń alynǵany týraly, bir avtobýstan ekinshisine otyrǵan kezde tólemniń ekinshi ret alynbaý ádisiniń jumys istemeıtini jaıly osyǵan deıin kóp aıtylǵan bolatyn. Eki ret tólemniń alynýy týraly máseleniń bolýy múmkin emes. Sebebi, bul - biryńǵaı júıe. Barlyq qurylǵy bir júıe boıynsha jumys isteıdi», - dedi Dáýren Nurálıev kompanııada ótken dóńgelek ústel barysynda.
Dáýren Nurálıev dálel retinde dóńgelek ústel barysynda tólem qabyldaıtyn apparatqa óz kartasyn basyp kórsetip, eki ret tólemniń alynbaıtyndyǵyn kórsetti.
Eske sala ketsek, Adam quqyqtary jónindegi ulttyq ortalyq qoǵamdyq kólikterge tekserý júrgizip, onyń qorytyndysyn jarııalaǵan bolatyn. QR Adam quqyqtary jónindegi ýákil Asqar Shákirov «valıdatorlardyń eki ret jolaqy alady» degen turǵyndardyń kúdiginiń rastalǵanyn aıtqan edi.
Al onyń aldynda jolaýshylar aldyńǵy esikten kirgendegi valıdator 180 teńge, al avtobýstardyń basqa valıdatorlary 90 teńge alatynyn aıtyp aryzdanǵan edi. «Astana LRT» ókilderi «kólik kartalarynan eki ret tólem alynýy múmkin emes» dep jaýap bergen bolatyn.
