Astana LRT kólik kartasyn toltyrýdyń jańa tásilin engizedi
ASTANA. QazAqparat - Astana LRT kólik kartasyn toltyrýdyń jańa tásilin engizedi. Ol úshin arnaıy agentter gadjet túrindegi arnaıy tehnologııa arqyly qarapaıym qurylǵyny qoldanatyn bolady, dep habarlaıdy Astana qalasy ákimdiginiń resmı saıty.
Jyl aıaǵyna deıin Astana LRT 100 agenttik núkte ashpaq. Osyndaı ár núktede arnaıy agentter otyratyn bolady. Ol NFC fýnktsııasy bar gadjet túrindegi qurylǵylardy qoldana otyryp bir tetikti basý arqyly kólik kartasyn tolyqtyryp beredi. Qoldanýshylarǵa arnaıy agenttik núktelerde kartany toltyrý úshin karta men aqsha ǵana qajet. Gadjet nemese smartfonnyń da qajeti bolmaıdy.
«Jańalyq kompanııanyń kólik kartalaryn toltyrý úshin qoldanylatyn qymbat turatyn jabdyqtardy alýǵa ketetin shyǵyndardy tómendetýge múmkindik beredi. Jańashyldyq qoǵamdyq kólikte kólik kartasyn qoldanatyn barlyq turǵyndardyń yńǵaılylyǵy úshin engizilip otyr. Bul tásil - kólik kartasyn tolyqtyrýdyń qosymsha túri. Qoldanystaǵy tásilder alynbaıdy», - delingen baspasóz habarlamasynda.
Aıta keteıik, kartalardy birden tolyqtyrý arnaıy kassalarda jáne RTVM avtomattarynda júzege asyrylady. 6 kassa men 30 avtomat jumys istep tur.
